Avtordyń tól mádenıetine óte jaqyn ekendigin jáne ony joǵary baǵalaıtynyn anyq ańǵarýǵa bolady
Londonda almatylyq sýretshi Aıǵana Ǵalıdyń kórmesi uıymdastyryldy. Avtor abstraksıa stılinde salynǵan sýretteriniń jańa toptamasyn jaryq taqyrybymen baılanystyrǵan, dep habarlaıdy Almaty-akshamy.kz Aikyn.kz-ke silteme jasap.
Jarqyraǵan sharlar, ımpúlstik elektr aǵyndary, sary sáýleler – munyń bári Aıǵana Ǵalıdiń sýretterinde kórinis tapqan. Avtor óz eńbekterinde jaryqpen shaǵylysyp, ártúrli keıipke engen zattardy beıneleýge tyrysqan. «Kartınalar múldem basqa tilde sóıleıdi. Kvanttyq fızıka nemese kosmologıa tili me dersiń», – deıdi sarapshylar.
Aıǵana sýretterine ulttyq reń berip, kartınalaryn «Shańqobyz», «Kıiz úı», «Qosyn» jáne «Órnek» dep ataǵan.
«Avtordyń tól mádenıetine óte jaqyn ekendigin jáne ony joǵary baǵalaıtynyn anyq ańǵarýǵa bolady. Ol kóptegen jumysy arqyly uly daladan bastaý alatyn Táńirshildik ıdeıasyn jetkizýge tyrysqan. Biraq onyń shyǵarmashylyǵynyń dinge esh qatysy joq, abstraktilik óner dep baǵalar edim», – deıdi kórme kýratory, sarapshy Nıko Kos Erl.
Aıǵana Ǵalı óz shyǵarmashylyǵynda kenep pen qaǵazdan bastap, toqyma men qolaǵa deıin paıdalanady. Sýretshi – Almaty qalasynyń týmasy. Aıǵana álemniń túkpir-túkpirinde kórmeler ótkizip, týyndylary arqyly halqymyzdyń baı mádenı murasyn nasıhattap júr.