Sharada aǵylshyn tiline alǵash ret aýdarylǵan «Ahmet Baıtursynuly jáne Alash» kitabynyń tusaýy kesildi.
Kitapty Ulttyq aýdarma búrosy basyp shyǵarǵan, dep habarlaıdy Almaty-akshamy.kz Elorda.info saıtyna silteme jasap.
Qazaqstannyń Birikken Koróldiktegi elshiligi uıymdastyrǵan sharaǵa brıtanıalyq shyǵarmashylyq ıntellıgensıa ókilderi qatysty. Aǵylshyn aqyn-jazýshylaryna, aýdarmashylaryna Ahmet Baıtursynulynyń ómiri jáne shyǵarmashylyǵymen tereńirek tanysýǵa jaǵdaı jasaldy.
Jınaqqa qazaq ádebıeti jáne mádenıeti kórnekti qaıratkerleriniń Ahmet Baıtursynuly týraly jazǵan eńbekteri engen. İshinen Muhtar Áýezov, Mirjaqyp Dýlatov, Sáken Seıfýllınnen bólek, Mámbet Qoıgeldi, Darhan Qydyráli, Dıhan Qamzabekuly sıaqty qazirgi alashtanýshy ǵalymdardyń zertteýlerin de tabýǵa bolady.