Qazir Ersaıyn bir jas eki aıda.
Ersaıyn ómiriniń ekinshi kúni Almatydaǵy Balalar shuǵyl medısınalyq kómek kórsetý ortalyǵyndaǵy hırýrgtardyń qolyna túsken. Jasalǵan otadan keıin bala klınıkada bir jasqa deıin baqylaýda bolǵan, dep habarlaıdy Almaty-akshamy.kz Inbusuness.kz silteme jasap.
Bala asqazan-ishek joldarynyń týa bitken aqaýy, traheoóńeshtik jylankóz degen dıagnozben týǵan. Mundaı patologıamen náreste tamaq ishe almaǵan. Sondyqtan náreste týǵannan keıingi ekinshi kúni perzenthanadan balalar hırýrgıasyna aýystyrylǵan.
«Sol kúni balany otaǵa daıyndadyq, oǵan bizdiń ortalyqqa tıesili jańa tehnologıa boıynsha ota – torakoskopıalyq ádispen óńeshtiń tikeleı anastomozy jasaldy. 10 kúnniń ishinde bala bizdiń stasıonarda emdelip, úıge shyǵaryldy. Bizdiń klınıkada 1 jasqa deıin baqylaýda boldy. Qazir bala bir jas eki aıda. Búgin onyń ájesi, atasy men ata-anasy ulttyq dástúr – tusaý kesýdi maǵan tapsyrdy. Olar balasynyń bolashaqta dáriger bolǵanyn, basqalardyń ómirin saqtaǵanyn qalaıdy. Bul dástúrdi tek tańdaýly adamǵa ǵana senip tapsyrady. Balanyń bolashaq taǵdyry men ómirine qatysty bolýǵa qýanyshtymyz. Jyl saıyn osyndaı 5-6 balaǵa rásim jasaımyz», - deıdi balalar hırýrgi, qabyldaý bóliminiń meńgerýshisi Meıirjan Qurmanalıev.
Hırýrgter atap ótkendeı, mundaı ota Almaty Balalar jedel medısınalyq járdem kórsetý ortalyǵynda 2013 jyldan beri jasalyp keledi. Toǵyz jyl ishinde 60-qa jýyq jańa týǵan nárestege ota jasaldy. Ótken jyldyń ózinde neonataldy hırýrgtar 10 sábıdi aman alyp qaldy. Dárigerlerdiń tájirıbesi men biliktiligi oń nátıjege qol jetkizýge múmkindik beredi. Búginde aýrýhana Almaty qalasynyń turǵyndaryna, sondaı-aq elimizdiń ózge óńirlerinen kelgen balalarǵa kómek kórsetýge daıyn.