Qazaqstandyq boksshylar Lıverpýlde (Anglıa) ótip jatqan álem chempıonatynda senimdi óner kórsetip, shırek fınalǵa joldama aldy, dep habarlaıdy Aqshamnews.kz tilshisi.
Sanjar Táshkenbaıdyń jeńisi
50 kelige deıingi salmaqta synǵa túsken Sanjar Táshkenbaı 1/8 fınalda Iordanıa ókili Hýthaıfa Eshıshemen qolǵap túıistirdi. Qıyn ótken jekpe-jekte ol tóreshilerdiń bólek sheshimimen – 3:2 esebimen jeńiske jetti.
Shırek fınalda Táshkenbaı Úndistan boksshysy Jadýman Mandengbammen kezdesedi.
Aıta keteıik, ol – 2023 jylǵy álem chempıony jáne 2022 jylǵy Azıa birinshiliginiń jeńimpazy.
Ertýǵan Zeınýllınov senimdi óner kórsetti
65 kelige deıingi salmaqta Ertýǵan Zeınýllınov Anglıa ókili Patrıs Mýgalzamen judyryqtasty. Alǵashqy raýnd rıng ıesiniń paıdasyna sheshilgenimen (4:1), ekinshi raýndta basymdyq qazaqstandyq boksshyǵa ótti (4:1).
Sheshýshi úshinshi raýndta Zeınýllınov aıqyn basymdyq tanytyp, 5:0 esebimen alǵa shyqty. Nátıjesinde ol tóreshilerdiń bir aýyzdan qabyldaǵan sheshimimen jeńiske jetti – 4:0.
Ertýǵan endi fınlándıalyq Ismaıl Ýmar men ózbekstandyq Asadhýdja Mýıdınhýjaev arasyndaǵy jekpe-jek jeńimpazymen kezdesedi.
Nurbek Oralbaı da shırek fınalda
80 kelige deıingi salmaqta Londonda ótken Olımpıadanyń kúmis júldegeri, 2023 jylǵy álem chempıony Nurbek Oralbaı da 1/8 fınalda jeńiske jetti. Ol Qytaıdan kelgen etnıkalyq qazaq Toqtarbek Tańathandy bir aýyzdan tóreshiler sheshimimen tize búktirdi.
Birinshi jáne ekinshi raýndta Oralbaı aıqyn basym boldy (5:0), al sońǵy raýndta qytaılyq boksshynyń paıdasyna bir upaı tirkeldi (4:1).
10 qyrkúıekte ol jastar arasyndaǵy álem chempıony, ózbek boksshysy Djavohır Ýmmatalıevpen kezdesedi.
Nazym Qyzaıbaıdyń aıqyn jeńisi
Áıelder arasynda Qazaqstan atynan synǵa túsken 2024 jylǵy Olımpıadanyń qola júldegeri, úsh dúrkin álem chempıony (2014, 2016, 2025) Nazym Qyzaıbaı da qarsylasyn oısyrata jeńdi.
48 kelige deıingi salmaqta ol Vengrıa ókili Lıla Zeleskıdi tehnıkalyq nokaýtpen utty. Ekinshi raýndta qarsylasy nokdaýnǵa tússe, úshinshi raýndta eki ret esep ashyldy. Osydan keıin tóreshi jekpe-jekti toqtatty.
Shırek fınalda Qyzaıbaı Ýkraına boksshysy Anna Ohotamen nemese Sıngapýr ókili Manısha Matıalaǵanmen kúsh synasady.