Sergek ITS sarapshylary tamyz jáne qyrkúıek aılarynda Astana men Almaty qalalaryndaǵy jol qozǵalysy jaǵdaıyn zerttedi. Zertteý nátıjesinde kúz kelgende júrgizýshilerdiń mejeli jerge ýaqytynda jetýi úshin jolǵa 30%-ǵa kóbirek ýaqyt
josparlaýy qajettigi anyqtaldy. Bul qyrkúıek aıynda keıbir kóshelerde kólik jyldamdyǵynyń 20-25%-ǵa tómendeýimen baılanysty, dep habarlaıdy aqshamnews.kz.
Aıta keteıik, jańa oqý jylynyń bastalýymen tańǵy qarbalas ýaqytta keıbir kóshelerde tamyz aıymen salystyrǵanda kólik sany eki ese kóbeıgen.
Máselen, 2 qyrkúıek kúni Astana qalasynda tańǵy 7:00-de Saraıshyk kóshesindegi ortasha jyldamdyq 26 tamyzdaǵy dúısenbidegi kórsetkishpen salystyrǵanda 20%-ǵa tómendedi. Bul kúni Saraıshyq kóshesine 7,5 myń kólik ornyna 11 myńnan astam júrgizýshi shyqqan. Uqsas jaǵdaı elordadaǵy basqa da negizgi dańǵyldarda baıqaldy.
Máselen, Máńgilik El dańǵylyna shyqqan kólikter sany shamamen 40%-ǵa, al Turan dańǵylynda 30%-ǵa artqan.
Almaty qalasynda kólik qozǵalysy eń kóp júktelgen dańǵyldar – Ál-Farabı jáne Abaı dańǵyldary boldy. 2 qyrkúıek kúni tańerteń batys baǵytta Ál-Farabı dańǵylyna 8 myń kólik ornyna 11 myń kólik shyǵyp, qozǵalys jyldamdyǵy 15%-ǵa tómendegen. Al Abaı dańǵylynda eki baǵytta da 17 myń kólik ornyna 23 myń kólik shyǵyp, qozǵalys
jyldamdyǵy birden 25%-ǵa tómendegen.
Sonymen qatar, Raıymbek dańǵylynda (14%), Tóle bı kóshesinde (20%) jáne Shyǵys aınalma jolynda (14%) kólik sanynyń óskeni baıqalǵan. Osylaısha, oqý jyly bastalǵanǵa deıin júrgizýshi jolda shamamen bir saǵat ýaqyt jumsasa, qazirgi jyldamdyq pen keptelisterdi eskersek, bul ýaqyt shamamen 1 saǵat 20 mınýtqa sozylady.
Taldaý barysynda 26 tamyz ben 2 qyrkúıek dúısenbi kúnderindegi ortasha qozǵalys jyldamdyǵy men kólik sany sıaqty parametrler negizge alyndy. Zertteýge Astana men Almaty qalalarynyń eń júktelgen kósheleri engizildi.
Eske sala keteıik, Sergek ITS (Intelligent Transportation System) – bul qaladaǵy keptelisterdiń sebepterin anyqtaýǵa, qoǵamdyq kólik úshin tıimdi baǵyttar men kesteler qurýǵa, qalalyq ınfraqurylymdy josparlaýdy ózgertýge, sondaı-aq adamdardyń maıatnıktik kóshi-qonynyń
sebepterin túsinýge múmkindik beretin ıntellektýaldy kólik júıesi.