Almatylyq dáriger kúzde qandaı aýrýdyń órshıtinin aıtty
Kúz - adam densaýlyǵynyń nasharlaı túsetin mezgili. Almaty №16 qalalyq emhananyń dárigeri Baqytjan Sembekova kúzde keıbir aýrýmen aýyratyn naýqastardyń sany artatynyn atap ótti, dep habarlaıdy almaty-akshamy.kz
Mamannyń aıtýynsha, kúzde vırýstyq ınfeksıalar kezeńi bastalady jáne JRVI men tumaý kóktemge deıin jalǵasady.
"JRVI jáne tumaý - osy kezeńdegi eń kóp taraǵan aýrý. Kúzde alergıa kúsheıedi, óıtkeni aýa qurǵaq jáne salqyn bolady, sonymen qatar japyraq túsetin kezeń bastalady, bul alergıalyq reaksıanyń joǵarylaýyna ákelýi múmkin. Alergıanyń belgileri bárine belgili, murynnyń bitelýi, jótel, túshkirý, kóz ben murynnyń qyshýy", - deıdi Baqytjan Sembekova.
Aýa-raıynyń ózgerýi, maýsymdyq alergender jáne vırýstyq ınfeksıalar astmaǵa ákelýi múmkin. Sonymen qatar, kúzde aýa-raıy men atmosferalyq qysymnyń ózgerýi artrıtpen aýyratyn naýqas sanynyń artýyna ákeledi. Kúzde kóptegen adam depressıadan zardap shegedi. Bul kún sáýlesiniń tómendeýine jáne kún rejıminiń ózgerýine baılanysty.
Kúzde bul aýrýlardyń órshýine jol bermeý úshin óz densaýlyǵyńyzdy baqylaý, durys tamaqtaný, ımýnıtetti nyǵaıtý jáne belsendi ómir saltyn ustaný qajet.
"Eger sizde qandaı da bir belgiler paıda bolsa, keńes alý jáne emdeý úshin dárigerge kórinińiz", - dep túıindedi ol.