Qazaqstan ulttyq quramasy EuroSkills chempıonatyna qatysý tarıhynda úzdik nátıje kórsetip, eki medal jáne tórt «Úzdik medalón» jeńip aldy.
Polshanyń Gdansk qalasynda ótken jarysqa álemniń 32 elinen 25 jasqa deıingi 600 myqty jas maman qatysty, dep habarlaıdy Almaty-akshamy.kz Forbes.kz-ke silteme jasap.
EuroSkills Gdańsk 2023 segizinshi eýropalyq chempıonatynyń úsh konkýrstyq kúniniń qorytyndysy boıynsha Qazaqstan ulttyq quramasynyń músheleri bir kúmis jáne bir qola medal jeńip aldy.
Rýslan Iýsýpov «Veb-tehnologıalar» quzyrettiliginde «kúmis» ıelendi, al Andreı Stepanúk pen Stanıslav Gorısın «Jelilik jáne júıelik ákimshilendirý» boıynsha qurama qorjynyn qola medalmen tolyqtyrdy.
Sonymen qatar, Alýa Jarasbaeva (Grafıkalyq dızaın), Erasyl Baqytjan (CAD ınjenerlik dızaıny), Vıtalıı Kaıl (Plıtkamen qaptaý), Ernıaz Qurmanbekov jáne Ańsar Orazǵalıev (mehatronıka) «Úzdik medalón» aldy.
Qazaqstan úshin bul Eýropa chempıonatyndaǵy úshinshi medal. 2021 jyly Pavlodar kolejiniń túlegi Dına Afanaseva «Veb-ázirleý» baǵyty boıynsha júldeli úshinshi orynǵa ıe bolǵan edi.
Bıyl jarys Polshanyń Gdansk qalasynda 5-9 qyrkúıek aralyǵynda ótti. Ulttyq quramanyń quramyna 28 qatysýshy jáne 25 halyqaralyq sarapshy kirdi. Qazaqstandyqtar 25 quzyret boıynsha qatysty.
EuroSkills chempıonaty - bul Eýropadaǵy kásiptik bilim berý jáne biliktilikti arttyrý salasyndaǵy mańyzdy is-shara. 25 jasqa deıingi adamdarǵa arnalǵan eń iri halyqaralyq kásibı sheberlik jarystary WorldSkills Europe qatysýshy elderiniń birinde eki jyl saıyn ótkiziledi.