Sanaýly kúnderden soń Albanıa astanasy Tıranada kúres túrlerinen kezekti álem chempıonatynyń jalaýy jelbireıdi.
Aldymen 23 jasqa deıingi palýandar bozkilemde beldesse, keıinnen eresekter olımpıadalyq emes salmaqtarda ózara kim myqtyny anyqtaıdy, dep habarlaıdy aqshamnews.kz.
Kúres túrlerinen álem chempıonaty 2005 jyldan beri jyl saıyn turaqty ótkizilip keledi. Al 2016 jyldan bastap Birikken kúres álemi (UWW) halyqaralyq federasıasynyń bastamasymen alǵash ret olımpıadalyq emes salmaqtardaǵy álem birinshiligi qolǵa alyndy. Iaǵnı, Olımpıada ótken jyly olımpıadalyq salmaqtarda álem chempıonaty uıymdastyrylmaıdy.
Olımpıadalyq emes salmaqtardaǵy alǵashqy jahandyq doda 2016 jyldyń 8-11 jeltoqsanynda Majarstannyń Býdapesht qalasynda ótti. Oǵan Qazaqstan quramasynyń alty palýany qatysyp, bir kúmis jáne bir qola medal jeńip aldy.
Erkin kúresten Nurlan Bekjanov (70 kg) kúmis júldeger atansa, áıelder kúresinen Aıym Ábdildına (55 kg) qola medal ıelendi. 2020 jyly ótýge tıis bolǵan jahandyq doda pandemıaǵa baılanysty ótpeı qaldy. Olımpıadalyq emes salmaqtardaǵy álem chempıonaty Olımpıada baǵdarlamasyna enbeı qalǵan tórt salmaq dárejesinde ótkiziledi. Atap aıtqanda, erkin kúres sheberleri 61, 70, 79, 92 kg, áıelder kúresi ókilderi 55, 59, 65, 72 kg jáne grek-rım kúresi palýandary 55, 63, 72, 82 kg salmaqtarda beldesedi. Bul doda atalǵan salmaqtaǵy palýandardyń jaryssyz qalmaýy úshin uıymdastyrylady. Sondyqtan Olımpıadaǵa qatysqan palýandar bul álem chempıonatynda óner kórsete almaıdy.
Eresekter arasyndaǵy álem chempıonaty 28 qazanda bastalyp, 31 qazanda máresine jetedi. Fınaldyq básekeler 29 qazan (grek-rım), 30 qazan (áıelder kúresi) jáne 31 qazan (erkin kúres) kúnderine josparlanǵan. Qazirgi tańda álem chempıonatyna qatysatyn Qazaqstan ulttyq quramasynyń palýandary anyqtalyp, jarysqa qarqyndy daıyndalyp jatyr.
Albanıadaǵy álem chempıonatynda tómendegi palýandarǵa senim artamyz.
Grek-rım kúresi: 55 keli salmaqta Isqar Qurbaev, 63 keli - Erjet Jarlyqasyn, 72 keli - Meıirjan Shermahanbet, 82 keli - Evgenıı Polıvadov.
Áıelder kúresi: 55 keli salmaqta Zúlfıa Iahárova, 59 keli - Dıana Qaıýmova, 65 keli - Irına Kazúlına, 72 keli - Jámıla Baqbergenova.
Erkin kúres: 61 keli - Asyl Aıtaqyn, 70 keli - Nurǵoja Qaıpanov, 79 keli - Dáýlet Ergesh, 92 keli Nurdáýlet Bekenov.