Almatylyqtarǵa kýrerge «kodty» taýardy tekserip alǵannan keıin ǵana aıtý keńesi berildi
«Ulttyq tutynýshylar lıgasy» Respýblıkalyq qoǵamdyq birlestiginiń prezıdenti Svetlana Romanovskaıa Almaty Óńirlik komýnıkasıalar qyzmeti uıymdastyrǵan baspasóz máslıhatynda jýrnalıserdiń suraqtaryna jaýap berdi. Onyń aıtýynsha, tutynýshylarǵa aqshany aıtarlyqtaı únemdep, sapasy tómen taýarlarǵa urynyp qalmaý úshin jappaı satylymǵa durys daıyndalýy kerektigin eskertti, dep habarlaıdy almaty-akshamy.kz.
Birinshiden, Romanovskaıa taýarlardy nesıege alýǵa keńes bermeıdi. Degenmen satyp alǵan taýardy eki apta ishinde qaıtarýǵa quqy bar sekildi tutynýshynyń nesıeden de osy ýaqyt ishinde bas tartýyna múmkindigi bar.
«Tutynýshylardyń quqyqtaryn qorǵaý týraly» Zańnyń 14-baby negizinde nesıeden bas tartýǵa bolady, tek osy eki apta ishindegi paıyzyn tóleıdi. Eger adamdardyń nesıege alǵan taýary unamasa, nemese kóńilinen shyqpaı qalsa, osyny esten shyǵarmaǵandary durys. Ekinshiden, adamdar taýarlardy qaıdan alyp jatqanyn túsingeni de óte mańyzdy. Sebebi alaıaqtyq áreketter jıi kezdesedi. Qazirdiń ózinde daıyndalyp, qajetti zat nemese qyzmet qansha turatynyn bilip alý kerek. Onyń qazir qansha turatynyn jáne «jeńildikter jumasynda» qanshaǵa satatynyn bilgen jón», - deıdi S. Romanovskaıa.
Úshinshi faktor – saýda ornyndaǵy barlyq taýardy qarap shyǵý kerek dep asyǵýdyń qajeti joq, aldymen ol zattyń Sizge qanshalyqty qajeti bar-joǵyn naqtylap alǵanyńyz jón. Satýshy taýar sapasyna kepildik beretinine jáne senim telefon nómirleriniń bar-joǵyna kóz jetkizgenińiz abzal. Eger de taýardy ınternet-dúkender arqyly satyp alǵan bolsańyz, onda taýardy jetkizýshi kýrerge birden «kodty» aıtpańyz. Aldymen taýardyń sapasyn tekserip, múlkińiz kóńilge qonǵan kezde baryp jasyryn «kodty» aıtqan jón.
«Tutynýshy taýar belgilerin saqtaı otyryp, ony aqyryn ashyp, qaraı alady. Eger kýrer ózin jaı ǵana jetkizýshi jáne taýarǵa esh qatysy joǵyn aıta bastasa, senbeńiz. Eger taýar Sizdiń kóńilińizden shyqqannan keıin kodty habarlańyz»- deıdi sarapshy.