Ózbekstan İİM delegasıasy qazaqstandyq polısıanyń sıfrlyq sheshimderimen tanysty
İshki ister mınıstriniń orynbasary Zýfar Qurbanov bastaǵan Ózbekstan İİM delegasıasy elimizdiń polısıa vedomstvosyna keldi, dep habarlaıdy almaty-akshamy.kz
Qonaqtar qoǵamdyq tártip pen azamattardyń qaýipsizdigin qamtamasyz etý, olardyń konstıtýsıalyq quqyqtaryn saqtaý úshin polısıa jumysyna engizilgen sıfrlyq sheshimdermen tanysty.
Sheteldik áriptesterge jol júrisi qaǵıdalaryn buzýshylardy anyqtaýǵa kómektesetin “Qorǵaý” júıesi kórsetildi, “Sıfrlyq polıseı” jobasy aıasynda alynǵan polısıa qyzmetkerleriniń jańa beınejetondarynyń erekshelikteri týraly aıtyldy.
Ózbek delegasıasyna búkil el boıynsha oqý oryndarynda ornatylǵan beınekameralar men dabyl túımeleriniń jumysy, ishki kadrlyq prosesterdi ońtaılandyrý jáne polısıa qyzmetkerlerimen halyqqa kórsetetin memlekettik qyzmetterdi sıfrlandyrý tanystyryldy.
Aıta keteıik, bul jobalar quqyq buzýshylyqtardyń aldyn alýdyń tıimdi tetigi ǵana emes, sonymen qatar qylmystardy jedel ashý quraly retinde de áreket etedi. Máselen, respýblıka boıynsha kameralardyń kómegimen jyl basynan beri 8 myńnan astam qylmys ashylyp, 465 myń ákimshilik quqyq buzýshylyqqa tosqaýyl qoıyldy, 4,6 mln jol júrisi qaǵıdasyn buzý deregi tirkeldi.
Qonaqtar qaladaǵy jedel jaǵdaı týraly aqparatty táýlik boıy úzdiksiz jınaý jáne taldaý úshin beınebaqylaý múmkindikterin paıdalanatyn elordalyq jedel basqarý ortalyǵyna bardy. Sondaı-aq olarǵa mınıstrliktiń molekýlalyq-genetıkalyq zerthanasynyń jumysy kórsetildi.
Sonymen qatar kórshi memlekettiń tártip saqshylary qylmystyq-atqarý júıesi komıtetiniń ahýaldyq ortalyǵynyń jumysyn zerdeledi, onda eldegi barlyq penıtensıarlyq mekemelerdegi jaǵdaı baqylanady. Sapar aıasynda Ózbekstan delegasıasy elordalyq kıberpolısıaǵa, HQKO men arnaıy HQKO-ǵa bardy.