№4 A.S. Pýshkın atyndaǵy gımnazıasynda «Kúnshýaq-Solnyshko» lageri óz jumysyn bastady
2023-2024 oqý jyly aıaqtaldy, biraq Medeý aýdanyna qarasty №4 A.S. Pýshkın atyndaǵy gımnazıasy muǵalimderi men oqýshylary úshin mektep ómiri jalǵasa beredi. Mektep tek bilim ordasy ǵana emes, sonymen qatar tárbıeniń san alýan mazmunyn uıymdastyratyn meken bolyp tabylady.
Gımnazıada 10 kúndik «Kúnshýaq-Solnyshko» mektep janyndaǵy saýyqtyrý lageri óz jumysyn josparly túrde bastap ketti. Bul lagerde 120 oqýshy bilim men tárbıe alyp jatyr. Mektep dırektory S.M. Ensepbaeva jáne lager jetekshisi E.N. Vnýkovskaıa basshylyǵymen jumys kestesi 09:00-den 15:00-ge deıin jalǵasady.
Lager baǵdarlamasy men tárbıeshiler
Bastaýysh synyp muǵalimderi Janaberdıeva N.K., Tortbaeva I.V., Sherbýlova N.Iý., Mýrzabekova K.A. tárbıeshilik jumystarǵa bekitilgen. Lager baǵdarlamasy tańerteńgilik jattyǵýlardan, tańǵy astardan, úıirmelerden jáne demalys oryndaryna saıahattardan turady. Memleket tarapynan qarjylandyrylǵan túski as máziri dárýmenderge baı jáne balalardyń densaýlyǵyna asa mán beredi.
Sporttyq sharalar men dene shynyqtyrý
Dene shynyqtyrý páni muǵalimderi Býtakov V.P., Kartbaeva K.V., Karımov A.M., Mınakova Ia.F. sporttyq sharalarmen aınalysady. Tárbıeshiler men ustazdar balalardyń jas erekshelikterine qaraı jeke, juptyq jáne toptyq jumys josparlaryn jasaǵan.
Ulttyq tárbıe jáne tildik kýrstar
Gımnazıa orys tildi bolǵanymen, qazaq tiliniń mártebesine zor mán beriledi. Lagerde qazaq tilinde amandasý, bata-tilek aıtý, dombyrada oınap, «Qamajaı» bıin bıleý, «Men jastarǵa senemin» dep óleń aıtý ulttyq tárbıeniń kórinisi bolyp tabylady. Qazaq tili kýrstarynda jas mamandar Marına Eskermes jáne Samal Kalybekqyzy jumys jasaıdy.
Aǵylshyn tilinen Tagıeva M.V., Ivanchenko K.E., Tımonenkova M.V., Ámirhan P.Z., Kasenova B.B., Maktymkýlova R.O., Baımendetova G.A. qyzyqty metodıkalarmen, jasandy ıntellekt negizinde sabaq ótkizedi. Kúndelikti jumys kestesi Qazaqstan Respýblıkasynyń memlekettik Ánuranymen bastalady.
Lagerdiń maqsaty men mindetteri
Lagerdiń negizgi maqsaty – árbir oqýshyny jaqsylyqqa, adamgershilikke, uıymshyldyqqa tárbıeleý jáne jazǵy demalys ýaqytyn tıimdi paıdalana bilýge úıretý. Balalardyń jaz mezgilindegi demalysyn tıimdi ári maǵynaly ótkizýge jaǵdaı jasaý, qaýipsizdik erejelerin úırete otyryp salaýatty ómir saltyn qalyptastyrý, rýhanı jáne mádenı bilimderin jetildirý, salt-dástúrin damytý, Otansúıgishtik-patrıottyq sezimin arttyrý.
Lager mindetteri:
- Balalardyń ýaqytymen, tolyq kelýlerin qadaǵalaý
- Ár kúndi baǵdarlama boıynsha uıymdastyrý
- Oıyn alańyndaǵy dene jattyǵýlaryn baqylaý
- Saıahat jáne joryq kezindegi qaýipsizdik erejelerin saqtaý
- Biryńǵaı tártipte saltanatty jıyndar ótkizý
- Shyǵarmashylyq qabiletterin arttyrý maqsatynda kórme, konkýrs uıymdastyrý
- Ulttyq oıyndar, logıkalyq jáne sporttyq oıyn túrleri arqyly balalardyń qyzyǵýshylyǵyn arttyrý
Ata-analarmen tyǵyz baılanys
Lager tek oqýshylarmen ǵana emes, mektepke alyp kelýshi ár ata-anamen tyǵyz baılanys ornatqan. Ata-analar tarapynan mektep pen uıymdastyrýshylarǵa alǵys-tilekter sany artyp jatyr. Tipti mektepten qaıtpaýdy jón kóretin oqýshylardyń bar ekendigi de belgili.
Bul-qolaıly ortanyń qalyptasqanynan, qyzyqty sabaqtar men oıyndar bar ekeninen habar beredi. Osy sebepti sapaly bilim men sanaly tárbıe úshin jasalyp jatqan ıgi ister sany №4 gımnazıada arta túspek Sondyqtan demalys ýaqyttarynda mektep esigi balalarǵa da, ustazdarǵa da ashyq.