Eldiń birneshe óńirinde qardyń qarqyndy erýi, jáne ózenderdegi sý deńgeıiniń kóterilýi kútiledi
Qazgıdromettiń 2-8 sáýirge arnalǵan boljamy boıynsha, elimizdiń batysynda, ortalyǵynda jáne shyǵysynda aýa temperatýrasy plús 23 gradýsqa deıin jylynady. Al soltústiginde kúndiz aýa temperatýrasy plús 18°S-qa, ońtústik óńirlerde 28 gradýsqa kóteriledi, dep habarlaıdy Almaty-akshamy.kz.
2-8 sáýirindegi aptalyq sınoptıkalyq aýa raıy boljamyna sáıkes, batystan shyǵysqa qaraı kezekti Atlantıkalyq sıklon yǵysa bastaıdy. Ol negizinen jańbyr túrinde jaýyn-shashynnyń túsýine jáne aldymen batys pen soltústikte, kezeńniń ortasynan QR qalǵan aýmaǵynda jeldiń kúsheıýine sebepshi bolady.
Qazgıdlromet málimetine qaraǵanda, sıklonnyń artynan Batys antısıklony aýysady. Ol ózimen birge qysqa merzimge aýa temperatýrasynyń tómendeýine alyp keledi. Osyǵan baılanysty Qazaqstannyń jazyq aýmaqtarynda, atap aıtqanda Qaraǵandy, Aqmola, Soltústik Qazaqstan, Qostanaı, Aqtóbe, Batys Qazaqstan, Pavlodar oblystary, Shyǵys Qazaqstan oblysynyń ońtústigi men ońtústik-batys bóliginde qardyń qarqyndy erýi, jáne ózenderdegi sý deńgeıiniń kóterilýi kútiledi.