QR Memlekettik qyzmet isteri agenttiginiń Almaty qalasy boıynsha departamentiniń qyzmetindegi negizgi basymdyqtardyń biri – memlekettik qyzmet kórsetý sapasyn baqylaý jáne baǵalaý bolyp tabylady.
Aıta ketý kerek, Almaty qalasynda jyl saıyn 20 mıllıonnan astam memlekettik qyzmet kórsetiledi, olardyń 90%-y elektrondy túrde júzege asyrylady. Departament óz qyzmetiniń aıasynda turaqty túrde qyzmet alýshylardyń quqyqtaryn qalpyna keltirý boıynsha baqylaý is-sharalaryn júrgizip otyrady.
Mysaly, «Almaty qalasynyń Halyqaralyq Áýejaıy» AQ tarapynan kelip túsken shaǵym negizinde, «Almaty qalasynyń qalalyq josparlaý jáne ýrbanıstıka basqarmasy» KMM-de «Jer ýchaskesiniń nysanaly maqsatyn ózgertýge sheshim berý» memlekettik qyzmetin kórsetýden bas tartýdyń zańdylyǵy men tártibin tekserý júrgizildi.
Tekserý nátıjesinde memlekettik qyzmet kórsetýden negizsiz bas tartý jáne bas tartý tártibin buzý faktileri tolyq rastaldy. Osyǵan baılanysty Basqarmaǵa qyzmet alýshynyń quqyqtaryn qalpyna keltirý jáne buzýshylyqtardy joıý jóninde nusqama jiberildi. Sonymen qatar, Basqarma basshysynyń orynbasary QR Ákimshilik quqyq buzýshylyq týraly kodeksiniń 465-babynyń talaptaryn buzǵany úshin ákimshilik jaýapkershilikke tartyldy. Buzýshylyqqa jol bergen jaýapty tulǵaǵa tártiptik shara qoldanyldy.
Qazirgi ýaqytta jer ýchaskesiniń nysanaly maqsatyn ózgertý arqyly qyzmet alýshynyń quqyqtary tolyq qalpyna keltirildi.
Uqsas jaǵdaı S. esimdi qyzmet alýshynyń shaǵymy boıynsha da anyqtalyp, shaǵymda kórsetilgen faktiler rastaldy. Nátıjesinde basqarmaǵa tıisti usynys hat jiberilip, qyzmet alýshynyń quqyqtary tolyq qalpyna keltirildi. Basqarmanyń jaýapty qyzmetkeri QR ÁQtK 465-babynyń talaptaryn buzǵany úshin ákimshilik jaýapkershilikke tartyldy.
Esterińizge sala keteıik, eger memlekettik qyzmet kórsetýden negizsiz bas tartylyp, zańdy quqyqtaryńyz buzylǵan jaǵdaıda, Siz QR Memlekettik qyzmet isteri agenttiginiń Almaty qalasy boıynsha departamentine kelesi mekenjaı boıynsha habarlasa alasyz: Almaty q., Dostyq dańǵyly 134, «Pıoner 2» bıznes ortalyǵy nemese +7 (727) 254 90 05 telefonyna qońyraý shalýǵa bolady. Sondaı-aq, ótinishterińizdi «e-otinish» platformasy arqyly da joldaýǵa múmkindik bar.
Qosymsha, azamattardyń memlekettik organdarmen ózara baılanysyn jeńildetý maqsatynda, Telegram qosymshasyndaǵy «EgovKZBot2.0» platformasynda jańa «ýákiletti organ» fýnksıasy ázirlendi. Bul fýnksıa azamattardyń ótinishterine jedel áreket etýge jáne tıimdilikti arttyrýǵa baǵyttalǵan.