Sahnalanǵan spektákldiń saryny men stıli ádettegiden erekshe.
«Almatydaǵy altyn kúz Qazaqkonsertpen birge» jobasy aıasynda «Astana Musical» memlekettik teatry almatylylyqtarǵa gastróldik saparmen taban tiredi, dep habarlaıdy Almaty-akshamy.kz
Teatr ujymy qala turǵyndary men qonaqtarynyń nazaryna R.Kýnıdiń «№13» komedıasyn usyndy.
Komedıalyq týyndy kórermenniń kóńilin sergitip, tamasha áser qaldyrdy. Kúlki men shytyrman oqıǵaǵa toly komedıanyń qoıýshy rejıseri Eslám Nurtazınniń aıtýynsha, «№13» pesasy – sońǵy onjyldyqtaǵy eń úzdik komedıalardyń biri. Reı Kýnıdyń bul tyrnaqaldy týyndysy 1991 jyly úzdik aǵylshyn komedıasy retinde Olıve Loýrens atyndaǵy syılyqpen marapattalǵan.
Elordalyq teatrdyń repertýaryna qosylǵan «№13» komedıanyń oqıǵa jelisi qonaq úıdegi №13 bólmede kórinis tabady. Sújettiń ıronıalyq satırasy úsh keıipkerdiń aınalasynda órbıdi. Basty ekeýi – bedeldi saıasatker men onyń hatshysy. Úshinshisi – eki kóńildestiń kezdesýin buzǵan qaraqshynyń máıiti.
Eń bastysy, abyroıyna nuqsan keltirmeýdi kózdegen keıipkerler máıitten tez qutylýdyń amalyn izdeıdi. Spektákldegi qaıtalanbas sújet, bir mezettik úreı, mansapqorlyqtyń kesirinen oryn alatyn sheksiz bylyq adam bolmysynyń shynaıy tabıǵatyn asha túsedi.
Qoıylym bastalysymen ezýine kúlki úıirilgen kórermender «Astana múzıkl» teatryna jyly lebizderin bildirip, barlyq obrazdardyń sheber somdalǵanyn jetkizdi. Tirshiliktiń kúıleýi, kúnkóristiń ıleýinen bosap, rızashylyqpen tamashalaǵan jeńil ári kóńildi spektákl kórermenderdiń jadynda erekshe saqtalyp qalary sózsiz.
Qoıylym teatrdyń jetekshi ártisteri M.Esqalı, A.Ómirzaqov, A.Aqıpbaev, A.Qapızov, Z.Tashtaeva, A.Jamash, A.Qusaıynova, Z.Jakenova jáne B.Baǵytjanovtardyń akterlik oıyndarymen ádemi órilgen.