Almaty ákimdigi dızeldi qoǵamdyq kólikti satyp alýǵa tyıym saldy.
Almatyda ekojúıeni baqylaý beketteriniń sany 16-dan 40-qa deıin artty. Bul týraly Ekologıa mınıstri Serikqalı Brekeshev qala turǵyndarymen kezdesýde aıtty, dep habarlaıdy Almaty-akshamy.kz QazAqparatqa silteme jasap.
Halyqpen kezdesý barysynda qalanyń ekologıalyq jaǵdaıy boıynsha kóptegen másele talqylandy.
Mınıstr Almaty birneshe jyldan beri eń lastanǵan qalalar tizimine enip kelgenin aıtty. Jyl saıyn qala atmosferasyna shamamen 138,7 myń tonna lastaýshy zattar shyǵarylady. Lastaný jylý kózderiniń (JEO-2 jáne JEO-3), jeke turǵyn úılerdiń jáne transporttyń shyǵaryndylarymen baılanysty. Budan bólek, Almaty qalasynyń atmosferalyq aýasynyń jaı-kúıine Almaty oblysynyń úsh irgeles aýdandaryndaǵy gazdandyrylmaǵan óńirlerdiń shyǵaryndylary teris áser etýde.
Bıylǵy 9 aıda el boıynsha atmosferaǵa 900 myń tonnaǵa jýyq lastaýshy zat shyqsa, sonyń 31,9 myń tonnasy Almaty úlesinde. 2021 jyldyń tıisti kezeńimen salystyrǵanda el boıynsha shyǵaryndylar 18% tómen (1,1 mln tonna), Almatyda - 28,4% tómen (44,6 myń tonna).
Sondaı-aq S.Brekeshev qalanyń ekologıalyq jaǵdaıyn jaqsartý jónindegi sharalar kesheni almatylyqtardyń pikirlerin eskere otyryp jasalǵanyn atap ótti. Osy oraıda, qaladaǵy ekojúıeni baqylaý beketteriniń sany 16-dan 40-qa deıin artty. Barlyq jańa beketterdi qoǵamdyq uıymdardyń kúshteri uıymdastyryp, Qazgıdromettiń biryńǵaı monıtorıń jelisine biriktirildi (11 beket – Eko sarapshy, 10 dachık – Pavel Plotısyn, 3 beket – Skaımaks). Sondaı-aq Almaty qalasynyń ákimdigi Azıa damý bankiniń kómegimen Qazgıdromettiń AirKZ mobıldik qosymshasymen ıntegrasıalanǵan taǵy 50 dachık ornatady.
Almaty ákimdigi dızeldi qoǵamdyq kólikti satyp alýǵa tyıym saldy. Qazirdiń ózinde 827 elektr jáne gaz avtobýstary satyp alyndy. Osy jyldyń sońyna deıin ekologıalyq taza qoǵamdyq kóliktiń jalpy sany 40% quraıtyn bolady. Al bes jyl ishinde qalalyq kólikti tolyǵymen gaz ben elektr energıasyna aýystyrý josparlanýda.