Almatyda 1 aqpan kúni «Kúı tóresi Qazanǵap» atty monografıalyq eńbektiń tusaýkeseri ótedi.
İs-sharany kitap avtorlary Abdýlhamıt jáne Saıra Raıymbergenovter uıymdastyrady, dep habarlaıdy Almaty-akshamy.kz.
Tusaýkeserge halyq kúıshisi Jumabaı Jansúgirov, tehnıka ǵylymdarynyń kandıdaty, halyq kúıshisi Altynbek Úmbetov, kúıshi Asylbek Kenegesov, halyq kúıshisi Rústembek Seıitov, halyqaralyq jáne respýblıkalyq saıystardyń júldegeri Jaılaý Asylhanov qatysady.
Jınaq arhıvtik jáne 1962-2021 jyldar aralyǵyndaǵy fólklorlyq ekspedısıa kezinde túsirilgen qundy fotosýrettermen (600-ge jýyq) bezendirilgen. Sonymen qatar, jınaqta Qazanǵaptyń dástúrli kúıshilik mektebiniń XIX-XX ǵasyr aralyǵyndaǵy tórt urpaqqa sozylǵan 74 shákirtiniń ómirbaıanymen qosa, olardyń Qazanǵap murasyn tarıhta qaldyrýǵa sińirgen eńbekteri jaıly baıandalady.
Alǵash ret kitapta Qazanǵap babamyzdyń shyǵarmalary (79 kúıi) jáne onyń kúılerin jetkizgen tikeleı shákirtteriniń buryn-sońdy jaryq kórmegen asa qundy úntaspalary men beınekórinisteri (120-dan astam fılmder) QR-kod arqyly berilip otyr.
Qazaqtyń ónertaný ǵylymynda halyq kompozıtorlaryna arnalǵan mundaı eńbek ınteraktıvti kitap retinde elimizde alǵash jarıalanyp otyr. Jınaq úsh tomnan turady. «Kúı tóresi Qazanǵap», «Vlastıtel kúev Kazangap» (oryssha) jáne «Qazanǵap. Kúıler» (notalary).
