Búgin Astanada Prezıdenttiń tóraǵalyǵymen elordany damytý máseleleri jóninde keńes ótti.
Onyń barysynda Memleket basshysy Astana qalasynyń jáne Aqmola oblysynyń ákimderi qala mańyndaǵy aýdandarda turatyn jurttyń ál-aýqatyn arttyrýǵa kúsh salýy kerektigin aıtty, dep habarlaıdy Almaty-akshamy.kz Aqordaǵa silteme jasap.
«Astana aglomerasıasy ınvestısıa tartýǵa, ınovasıalardy engizýge jáne bilikti mamandardyń eńbek etýine barynsha yńǵaıly bolýǵa tıis. Osy baǵyttaǵy jumysty jandandyrý qajet. Álem ekonomıkasynda túbegeıli ózgerister bolyp jatqan qazirgi kezeńde bul – óte ózekti másele. Biz osy tarıhı múmkindikti paıdalanyp, Elorda aımaǵyn elimizdiń ekonomıkalyq tiregine aınaldyrýymyz kerek», - dedi Memleket basshysy jıynda.
Sonymen qatar Prezıdent elordanyń damýy jańa úlgige kóshý kerektigin de aıtty.
«Astana ınovasıalyq shahar bolýy qajet. Álemde qalany basqarýdyń jańa sıfrlyq tásilderi qarqyndy túrde engizilip jatyr. Biz de buǵan basa nazar aýdarýymyz kerek. Men Birikken Arab Ámirlikterindegi qyryq eki kompanıanyń basshylarymen arnaıy kezdestim. Bul kompanıa jasandy ıntellektini damytý isinde kósh bastap otyr. Olar «aqyldy qala» jobasy aıasynda osy saladaǵy ozyq tájirıbesin bizge usynýǵa daıyn. Ákimdikke Sıfrlyq damý mınıstrligimen birlesip, bul jumysty dereý qolǵa alýdy tapsyramyn. Jalpy, İT-bıznes ókilderin jáne osy saladaǵy bilikti mamandardy tartý qajet. Sol arqyly bas qalamyz aımaqtyń «Digital nomads» ortalyǵyna aınalmaq», - dep tolyqtyrdy Qasym-Jomart Toqaev.