Osyndaı ataýmen Almatyda belgili ónertanýshylar Abdýlhamıt jáne Saıra Raıymbergenovterdiń dáýlesker kúıshiniń ómiri men shyǵarmashylyǵyna arnalǵan monografıasy jaryq kórdi.
Jınaq úsh tomnan turady. Birinshi tomy qazaq tilinde, ekinshi tomy orys tilinde basylǵan. Al úshinshi kitapta Qazanǵap kúıleriniń notasy jarıalanǵan.
Avtorlar "bul-ınteraktıvti kitap" deıdi. Mysaly, kúılerdiń tarıhyn oqyp, qasyndaǵy QR kodty bassańyz beınenusqasyn da kóre alasyz. Monografıada Qazanǵaptyń 73 shákirtiniń ómirbaıany jazylǵan. Munda da QR kodtyń kómegimen ótken ǵasyrdyń 60-shy jyldarynan bergi beınetaspalardy kórýge bolady.
Tanystyrylymnyń sońy konsertke ulasty. Qazanǵap Tilepbergenuly - 1854-1921 jyldar aralyǵynda ómir súrgen qazaqtyń áıgili kúıshi-kompozıtory. Onyń «Kókil», «İlme», «Aqjeleń», «Bógelek» sekildi kúıleri tyńdarmanǵa jaqsy tanys.
«Bul isti men 1978 jyly bastappyn. 1978 jyldan bastap qansha ekspedısıaǵa bardym. Sonaý Aqtóbe oblystarynyń búkil aýdandaryn araladym. Myna jaǵynda Túrikmenstanǵa shyǵyp kettim. Myna jaǵynda Qaraqalpaqstanǵa shyǵyp kettim. Myna jaǵynda Dońyztaý. Qaı jerde Qazanǵaptyń kúıin oryndaıtyn aqsaqal bar dese, sonyń izbasarlary bar dese, solardyń izimen júrdim», - deıdi kúıshi, óner zertteýshi Abdýlhamıt Raıymbergenov.