2024 jyldyń 4 jeltoqsanynda «AMANAT» partıasynyń Almaty qalalyq fılıaly Búrosynyń otyrysynda Krıstına Bekmýrzaevany Almaty máslıhatynyń depýtaty etip taǵaıyndaý týraly sheshim qabyldandy, dep habarlaıdy aqshamnews.kz
Bos mandat Asıa Aqanovanyń Almaty qalalyq Qoǵamdyq densaýlyq saqtaý basqarmasy basshysynyń mindetin atqarýshy qyzmetine taǵaıyndalýyna baılanysty paıda boldy.
Qazirgi ýaqytta Krıstına Bekmýrzaeva Almaty jastaryn, mádenıeti men sportyn qoldaý jobalyq keńsesiniń jetekshisi, «Almaty Creative» JSHS baqylaý keńesiniń múshesi jáne «Almaty Creative Bureau» shyǵarmashylyq birlestiginiń kóshbasshysy bolyp tabylady.
Óz mansabynda ol júzden astam iri jobalardy iske asyrýǵa qatysqan. Olardyń qatarynda Almatyda qoǵamdyq qaýymdastyq ortalyqtaryn qurý, «Shapaǵat» jáne «Áleýmettik qyzmetter úıi» áleýmettik ortalyqtaryn iske qosý, sondaı-aq kóshe óneri jobalary, sonyń ishinde Almaty Gallery ashylýy bar. Sonymen qatar, ol 15-ten astam kitaphana men mádenıet úılerin qalpyna keltirý jáne jańǵyrtý jumystarymen aınalysqan. Onyń portfelinde Astana, Pavlodar, Shymkent jáne Aqtóbe sekildi iri qalalardaǵy qoǵamdyq keńistikterdi modernızasıalaý jobalary da bar.
- Krıstına Bekmýrzaeva O. Tansyqbaev atyndaǵy Almaty kórkemsýret ýchılıshesinde, T. Júrgenov atyndaǵy Qazaq ulttyq óner akademıasynda, sondaı-aq Germanıanyń FH Aachen ýnıversıtetinde bilim alǵan.
- Áleýmettik jáne mádenı ortany damytýdaǵy úlesi úshin «Eren eńbegi úshin» memlekettik medalimen marapattalǵan.