2024 jyly Qazaqstanda jalpyǵa birdeı deklarasıalaýdyń úshinshi kezeńi aıaqtaldy. Bul kezeńde eldegi jáne sheteldegi aktıvterin alǵash ret kompanıa basshylary, quryltaıshylary jáne jeke kásipkerler deklarasıalady.
Deklarasıalardy qabyldaý 16 qyrkúıekte aıaqtaldy. Salyq organdary qujattardy tapsyrý qajettigin BAQ arqyly jáne SMS-habarlamalar arqyly turaqty túrde eske salyp otyrdy.
«Eger jeke kásipker nemese saýdamen aınalysatyn adam deklarasıa tapsyrmasa, olardyń bank shottaryndaǵy operasıalar ýaqytsha toqtatylýy múmkin. Zań buzýshylyqtardy joıǵannan keıin shottar bir jumys kúni ishinde qaıta ashylady. Deklarasıany ýaqytynda tapsyryp úlgermegen azamattarǵa birinshi ret eskertý berilip, ákimshilik jaýapkershilikke tartylady, — dep habarlady Qarjy mınıstrligi.
Bıyl deklarasıany 4,8 mıllıon adam tapsyrýy tıis bolatyn. Olardyń ishinde 68,3 myń jeke kásipker men jeke saýdamen aınalysatyn adamdardyń bank operasıalary buǵattalǵan.
17,5 myńnan astamy zań buzýshylyqtardy joıyp, olardyń shottary qaıta ashyldy.
Qarasha aıynyń sońynda kópshilik úshin deklarasıalaý mindettemesiniń joıylǵanyn Qarjy mınıstri Mádı Takıev túsindirgen bolatyn. Ol deklarasıalaýdyń memlekettik qyzmetkerlerge, kvazımemlekettik sektor basshylaryna jáne olardyń jubaılaryna qatysty saqtalatynyn atap ótti.