«Mansap kúni», «Jas Stars» kreatıvti is-sharasy jáne «Almaty TikTok challenge» - Almaty kreatıvti ındýstrıa basqarmasy uıymdastyratyn sharalar qatarynda.
Bul týraly Óńirlik komýnıkasıalar qyzmetinde ótken brıfıńte Almaty qalasy kreatıvti ındýstrıa basqarmasynyń basshysy Qaısar Sarybaev aıtty, dep habarlaıdy Almaty-akshamy.kz
Ol Almatyda «Almaty Creative Industries Forum-2021» birinshi kreatıvti onlaın-forýmy ótetinin, onyń aıasynda akselerasıa men kreatıvti startaptardyń «Creaton» chempıonatyn ótkizý josparlanǵanyn aıtty. Kúrdeli epıdemıologıalyq jaǵdaıǵa baılanysty shara onlaın túrde ótedi.
Sonymen qatar, kreatıvti ındýstrıalar basqarmasy almatylyqtardyń Qala kúnimen erekshe quttyqtaýlaryna arnalǵan «Almaty TikTok challenge» baıqaýyn bastady.
«Almatynyń tanymal tıktokerleri baıqaýǵa qatysa bastady, olar qalanyń ár jerinde beınerolıkter túsiredi, bul qalanyń týrısik jáne mádenı áleýetin damytýǵa yqpal etedi», - dep atap ótti Qaısar Sarybaev.
Tıktok keńistik týraly aıta otyryp, Qaısar Sarybaev osy áleýmettik jeliniń arqasynda almatylyq sıfrlyq medıa juldyzdarynyń búkil álemge tanymal ekenin basa aıtty. Mysaly, «homák» degen búrkenshik esimdi Alına Kım - búkil TMD aýmaǵynda eń tanymal tıktoker. Ol álemdegi úzdik úshtikte ekinshi orynda.
«Bizdiń qalada úlken shyǵarmashylyq áleýet bar, munda kreatıvti ıdeıalar quratyn talantty adamdar turady jáne jumys isteıdi. Olarǵa tek qarjylyq turǵydan ǵana emes, jalpy serpin berý qajet. Iaǵnı, kreatıvti orta, kreatıvti klasterler qurý. Eger ár aýdanda sizdiń shyǵarmashylyǵyńyzdy damytatyn oryndar bolsa, onda kreatıvshilerdiń sany geometrıalyq túrde artady», - dep sendirdi Qaısar Sarybaev.
Ol óz basqarmasynyń basty mindeti turǵyndarymyzdyń ómir súrý sapasyn jaqsartý ekenin atap ótti.
«Ekonomıkalyq áserden basqa, kreatıvti ındýstrıalar mańyzdy mádenı jáne áleýmettik qundylyqtardy shyǵarady. Dál osy jerde jalpy qoǵamnyń damýyna áser etetin maǵynalar, materıaldyq qundylyqtar men tendensıalar týady», - dep jalǵastyrdy spıker.
Aıta keterligi, Almatyda «Mansap kúni» jáne «Jas Stars» sıaqty shyǵarmashylyq is-sharalardy onlaın-formatta ótkizý josparlanýda.