Eńbek adamy
Medısına salasynda ómirdi qutqarý men densaýlyqty saqtaý – kúndelikti kúrdeli de qasıetti mindet. Almaty qalalyq ortalyq klınıkalyq aýrýhanasynyń oftalmologıa bóliminiń meńgerýshisi Gúlzat Ábdiraıymova úshin bul tek jumys qana emes, naǵyz ómirlik mısıa.
Qutqarylǵan kórý qabileti
Jaqynda aýrýhanaǵa aýyr jaraqatpen 69 jastaǵy er adam jetkizildi. Naýqas ústeldiń buryshyna soqtyǵysyp, kórý organyna úlken zaqym keltirgen. Dıagnoz óte kúrdeli boldy: kóz almasynyń aýyr kontýzıasy, aq qabyqtyń jyrtylýy, ishki qabattardyń túsip ketýi, jaraqattan keıingi afakıa, gemoftalm jáne tor qabyqtyń ajyraýy. Bul jaǵdaı naýqas úshin tolyq soqyrlyq qaýpin tóndirdi.
Degenmen Gúlzat Ábdiraıymova bastaǵan oftalmologtar komandasy óz sheberligin kórsetip, kóz janaryn saqtap qaldy. Birinshi kezeńde kózdiń jaraqaty hırýrgıalyq óńdeýden ótti. Keıin zamanaýı ádisterdi qoldana otyryp, vıtrektomıa, lazerlik koagýlásıa jáne biregeı ırıdohrýstalık dıafragmasyn ımplantasıalaý operasıasy sátti júzege asyryldy. Pasıent úshin jasandy radýjka men lınza arnaıy daıyndaldy.
Kásibı sheberlik pen janashyrlyq
Naýqastyń sózinshe, operasıa onyń ómirin túbegeıli ózgertti:
"Dıagnoz men úshin aýyr úkim sıaqty estildi. Biraq Gúlzat Ábdiraıymova bastaǵan dárigerlerdiń kásibıligi men adamgershiliginiń arqasynda kórý qabiletim qaıta oraldy. Men olarǵa ómir boıy rızamyn."
Bul tek bir oqıǵa ǵana emes. Gúlzat Ábdiraıymova men onyń komandasy kún saıyn júzdegen pasıenttiń densaýlyǵyn jaqsartyp, olardyń bolashaǵyna úmit syılaıdy.
Zamanaýı medısına men jańa tehnologıalar
Operasıa mindetti áleýmettik medısınalyq saqtandyrý (MÁMS) júıesi aıasynda ótkizildi. Bul joǵary tehnologıalyq medısınalyq kómekke qoljetimdilikti arttyryp, kóptegen naýqasqa kómek kórsetýge múmkindik berdi. Gúlzat Ábdiraıymova osy júıe aıasynda zamanaýı medısınanyń jańa múmkindikterin qoldana otyryp, óziniń kásibı qabiletin kórsetip keledi.
Mamandyqqa adaldyq
Gúlzat Ábdiraıymova – naǵyz óz isiniń sheberi. Onyń kásibıligi men janashyrlyǵy myńdaǵan adamnyń alǵysyna ıe. Ol tek bilikti maman ǵana emes, ár naýqasqa júrek jylýyn syılaı alatyn janashyr dáriger.
Gúlzat Ábdiraıymova – adamdarǵa kórý qabiletin ǵana emes, ómirge degen senimdilik pen bolashaqqa úmit syılaıtyn maman.