Koronavırýspen aýyryp jazylǵandardyń arasynda alty aıǵa deıin indettiń saldarynan aıyǵa almaıtyndar bolady.
Búgin Óńirlik komýnıkasıalar qyzmetiniń alańynda ótken «Postkovıdti ońaltý jáne medısınalyq kútim týraly» onlaın baspasóz-konferensıasynda Almaty qalasy qoǵamdyq densaýlyq basqarmasynyń №5 qalalyq klınıkalyq aýrýhanasynyń ınfeksıonıst dárigeri Olga Antıpova indettiń saldary týraly jan-jaqty túsinik berdi, dep habarlaıdy Almaty-akshamy.kz tilshisi.
«Koronavırýs ınfeksıasynyń sımptomsyz ótetin, jeńil, ortasha jáne aýyr túri baryn bárimiz bilemiz. Biraq bul jeńil túriniń saldary bolmaıdy degen sóz emes. Ár adamnyń aǵzasy ár túrli bolǵandyqtan, vırýstyń saldary da túrlishe bolýy múmkin. Alaıda KVI-diń jalpy saldary retinde pasıentterdiń 30 paıyzynda kezdesetin qan tamyrlary júıesiniń zaqymdanýy, uıqynyń buzylýy, sharshańqylyq, tersheńdikti aıta alamyn. Aýyryp jazylǵandardyń kóbi «tańerteń uıqydan oıanǵanda demalyp emes, sharshap turatyn boldym» dep shaǵymdanyp jatady. Munyń sebebi ınfeksıanyń áseri bolyp otyr, deni saý adamnyń ózi koronavırýs juqtyrǵan kezde, zaqymdalmaǵan bir de bir organy qalmaıdy. Al sozylmaly aýrýlary bar adam kovıdke shaldyqqanda, sol aýrýy odan ári asqynyp ketedi. Birinshi kezekte qan tamyrlary zaqymdalyp, qannyń uıýy ózgeriske ushyraıdy. İndetten jazylǵan soń bireýler bir aptada aýyrǵanyn umytyp ketip jatsa, ekinshileri jarty jylǵa deıin saldarymen kúresip júredi», - deıdi ınfeksıonıst dáriger.