Tájikstan astanasynda UQSHU Syrtqy ister, qorǵanys mınıstrleri keńesi men Qaýipsizdik keńesteri hatshylary komıtetiniń birlesken otyrysy ótti.
Premer-Mınıstrdiń orynbasary – Syrtqy ister mınıstri Muhtar Tileýberdi, Prezıdenttiń kómekshisi – Qaýipsizdik Keńesiniń hatshysy Áset Isekeshev jáne Qorǵanys mınıstri Murat Bektanov quramyna kirgen Qazaqstan Respýblıkasynyń delegasıasy Ujymdyq qaýipsizdik týraly shart uıymynyń jarǵylyq organdarynyń birlesken otyrysyna qatysty, dep habarlaıdy Almaty-akshamy.kz.
«İs-shara barysynda UQSHU-nyń aǵymdaǵy qyzmeti jáne ony damytý perspektıvalary týraly keń aýqymdy máseleler talqylandy. Qatysýshylar ózekti halyqaralyq problemalar boıynsha pikir almasty. Aýǵanstandaǵy jaǵdaıdy damytýǵa jáne UQSHU múshe memleketterdiń osy baǵyttaǵy birlesken is-qımyldaryna erekshe nazar aýdaryldy», – delingen Syrtqy ister mınıstrliginiń baspasóz qyzmetiniń habarlamasynda.
Dýshanbedegi kezdesýde Prezıdent Qasym-Jomart Toqaevtyń UQSHU aıasynda jańa ınstıtýt – UQSHU Bas hatshysynyń bitimgershilik máseleleri jónindegi arnaıy ókilin qurý týraly bastamasy qoldaý tapty. Qatysýshylar uıymǵa múshe memleketter basshylarynyń tıisti sheshiminiń jobasyn kelisti.
İs-shara qorytyndysy boıynsha, 2021 jylǵy 16 qyrkúıekte Dýshanbede UQSHU Ujymdyq Qaýipsizdik Keńesiniń sesıasyna shyǵarylatyn jobalar men basqa da qujattar maquldandy. Olardyń ishinde Ujymdyq Qaýipsizdik Keńesiniń deklarasıasy, Uıymnyń qorǵalǵan mýltıservıstik baılanys jelisiniń sqemasy týraly UQSHU Ujymdyq qaýipsizdik keńesi sheshimderiniń jobalary, UQSHU áskerı-ekonomıkalyq yntymaqtastyq jónindegi memleketaralyq komısıasynyń tóraǵasy, sondaı-aq áskerı jáne áskerı-tehnıkalyq sıpattaǵy máseleler boıynsha basqa da qujattar bar.
Syrtqy saıası vedomstvolardyń basshylary birqatar saıası málimdemeler qabyldady, sonyń ishinde Taıaý Shyǵys pen Soltústik Afrıkadaǵy daǵdarystyq jaǵdaılardy retteý jónindegi ujymdyq kúsh-jiger, Aýǵanstandaǵy jaǵdaı týraly, BUU Jarǵysynyń qaǵıdattaryna adaldyqty rastaý týraly, Qazaqstan bastamashylyq etken aqparattyq qaýipsizdik salasyndaǵy birlesken kúsh-jiger týraly.
UQSHU formatyndaǵy bıologıalyq qaýipsizdik máseleleri jónindegi qujattar qaralyp, kelisildi. Atap aıtqanda, 2002 jylǵy 7 qazandaǵy UQSHU Jarǵysyna ózgerister engizý týraly tórtinshi hattamanyń jáne «UQSHU Qaýipsizdik keńesteri hatshylarynyń komıteti týraly erejege ózgerister engizý týraly» UQSHU UQK sheshiminiń jobalary maquldandy, UQSHU múshe memleketterdiń bıologıalyq qaýipsizdik máseleleri jónindegi ýákiletti organdarynyń Úılestirý keńesin qurý týraly UQSHU QKHK sheshimine qol qoıyldy.
UQSHU múshe memleketterdiń qorǵanys vedomstvolarynyń basshylary áskerı komıtet týraly erejege ózgerister engizýge, medısınalyq qamtamasyz etý jáne uıym elderi úshin medısınalyq jáne farmasevtıkalyq mamandyqtar boıynsha áskerı kadrlar daıarlaý problemalaryn zertteý salasyndaǵy bazalyq ǵylymı-zertteý uıymdaryn bekitýge, áskerı kadrlardy birlesken daıarlaý júıesindegi áskerı oqý oryndarynyń ózara is-qımyl tártibi jónindegi usynymdardy, UQSHU Qorǵanys mınıstrleri Keńesiniń janyndaǵy áskerı kadrlardy birlesken daıarlaýdy úılestirý jónindegi jumys toby quramyn bekitýge baılanysty birqatar qujattardy maquldady.
UQSHU 2002 jyly qurylǵan halyqaralyq óńirlik uıym. Quramyna Qazaqstanmen qatar Armenıa, Belarýs, Qyrǵyzstan, Reseı jáne Tájikstan kiredi.
