Dúnıejúzilik kóshpendiler oıyndarynyń mádenı baǵdarlamasy aıasynda 100-den astam is-shara ótedi, dep habarlaıdy aqshamnews.kz.
Osy maqsatta elordada 10 gektar aýmaqty qamtıtyn etnoaýyl ashylǵan. Mundaǵy ár kún qazaq halqynyń baı mádenı murasy men dástúrlerin kórsetetin «Shattyq kerýeni» atty sherýmen bastalady. «Óner ordasy» basty sahnasynda kún saıyn eldiń túkpir-túkpirinen kelgen úzdik aımaqtyq ujymdardyń konserti ótedi. Munda etnofolklorlyq ansámblder, qazaq ulttyq orkestrleri, solıser jáne bı ujymdary dástúrli etnıkalyq stılde óner kórsetedi. Al etnoshatyr alańynda qolóner sheberleriniń jumystaryn kóre alasyz. Sondaı-aq, Aıtys mýzykalyq-poetıkalyq saıysyn tamashalaýǵa múmkindik bar.
Meıirbek Salamatov, aıtysker-aqyn: - Bizdiń Qazaqstannyń ár óńiriniń óziniń mádenıeti, tarıhy, óneri bar. Solardy nasıhattap, pash etý maqsatynda osy úlken mádenı sharalar uıymdastyrylyp jatyr. Mańǵystaý oblysynan osy Astana qalasynda ótip jatqan Kóshpendiler oıynyna aıtysker aqyn retinde keldim. Buıyrtsa osy Kóshpendiler oıynyna atsalysyp, Abaı oblysynyń aqynymen aıtysatyn bolamyn.