Almatyda tazylar qatysatyn Halyqaralyq kórme ótedi
2024 jylǵy 28-29 qyrkúıekte Almatyda «Avrora kýbogy» jáne «Kóshpendiler dalasy» atty barlyq ıt tuqymdary qatysatyn eki kórme ótedi. İs-sharany «Avrora» kınologıalyq klýby uıymdastyryp otyr, dep habarlaıdy aqshamnews.kz.
Halyqaralyq kórmege Qazaqstan, Ózbekstan, Qyrǵyzstan jáne Reseıden barlyǵy 500-den astam ıt qatysady. Elýden astam ıt tuqymy Qazaqstan chempıony jáne Halyqaralyq ásemdik chempıony ataqtaryn sarapqa salady. Oǵan Nıderland, Slovakıa, Grekıa jáne Qytaıdan kelgen halyqaralyq sarapshylar tórelik etedi.
Halyqaralyq kınologıalyq federasıa (FCI) kórmeleriniń tarıhynda tuńǵysh ret «qazaq tazysy» tuqymy 10-shy asyl tuqymdy tazylar tobynda resmı túrde jurtshylyq nazaryna usynylady.
Esterińizge sala keteıik, bıyl 3 qyrkúıekte Halyqaralyq kınologıalyq federasıa (FCI) qazaq tazysyn resmı túrde ádepki taný týraly sheshim shyǵaryp, Qazaqstanǵa osy tuqym standartynyń ıesi mártebesin berdi. Bul jetistikke QR Prezıdenti İs basqarmasynyń qamqorlyǵymen Qazaqstan kınologtary odaǵynyń qajyrly eńbeginiń jáne kúsh-jigeriniń, sondaı-aq biregeı tuqymdy saqtaýǵa, damytýǵa jáne tanymal etýge orasan zor úles qosqan kóptegen kınologtardyń, seleksıonerlerdiń, ıtbegiler men áýesqoı azamattardyń arqasynda qol jetkizildi. Sóıtip, osy kúnnen bastap qazaq tazysy FCI resmı moıyndaǵan basqa ıt tuqymdarymen teń dárejede álemniń kez kelgen elinde chempıon ataǵy úshin jarysqa qatysý, rıngke shyǵý quqyn ıelendi.
«Kóshpendiler dalasy» halyqaralyq ıtter kórmesinde qazaq tazysy rıngindegi eksponentterge Halyqaralyq kınologıalyq federasıanyń vıse-prezıdenti Jerard Iıppıng (Jerard Jipping) baǵa beretin bolady.
Sonymen qatar, «Kóshpendiler dalasy» halyqaralyq kórmesi aıasynda qazaq tazysy tuqymynyń kórmesi ótedi, onda eksponentter asyl tuqymdy ıtterdiń resmı standartyna sáıkes baǵalanady jáne chempıondyq ataqty ózara sarapqa salady.
Itter kórmesi qarsańynda «Avrora» kınologıalyq klýby Marwin shyǵarmashylyq áleminiń qoldaýymen 6-15 jas aralyǵyndaǵy balalar qatysqan «Kóshpendi jáne ıt» sýretshiler baıqaýyn ótkizdi. Qatysýshylardyń barlyq týyndylary 28 jáne 29 qyrkúıektegi kórmede jurtshylyq nazaryna usynylady. Kórmelerdiń alǵashqy kúni, ıaǵnı 28 qyrkúıekte kelýshiler ózderine unaǵan sýretke daýys berip, kórermender kózaıymy syılyǵyna laıyq týyndyny anyqtaıdy. Jeńimpazdar 29 qyrkúıekte ıtter kórmesiniń ashylýy qarsańynda marapatalady. Al baıqaýda jeńiske jetken týyndy búkil kórmeniń jeńimpazyna estelik syılyq retinde tapsyrylady.
Barlyq ıtter tuqymynyń ulttyq kórmesi – 28.09.2024 j. Bastalýy 09:00-de.
«Qazaq tazysy» monotuqymdy kórmesi – 29.09.2024 j. Bastalýy 09:00-de.
Barlyq ıtter tuqymynyń halyqaralyq kórmesi – 29.09.2024 j. Bastalýy 09:00.
Ótetin orny: «Tulpar» at sporty kesheni (Almaty q. Jansúgirov kóshesi, 262/2).