Jýyrda Qara Qyrǵyz avtonomıalyq oblysynyń 100 jyldyǵyna oraı «Rýh Beıne» halyqaralyq shyǵarmashylyq akademıasy men «AQTAL» ádebı shyǵarmashylyq birlestigi uıymdastyrǵan halyqaralyq sheńberdegi «Rýh-Fest Qyrǵyzstan – 100» festıvaliniń qorytyndy saltanaty Bishkek qalasyndaǵy Alykýl Osmonov atyndaǵy Qyrǵyz ulttyq kitaphanasynda ótti.
Aıyr qalpaqty kórshi eldiń qalamgerleri jarıalaǵan músháıraǵa óleń-tolǵaýyn joldaǵan qazaqstandyq Álem halyqtary jazýshylary odaǵynyń bir top músheleri festıváldiń mártebeli qonaǵy bolyp qatysyp qaıtty. Bir eldiń irge bekitýine ǵasyr tolǵan osynaý alqaly jıynǵa Reseıdiń «Altyn qalam» ádebı qoǵamdastyǵynyń negizin qalaýshy ári prezıdenti, jazýshy-jýrnalıs Svetlana Savıskaıa, «Adamzattyń Aıtmatovy» atanǵan ataqty jazýshy Shyńǵys Aıtmatovtyń qaryndasy, ǵalym-ustaz Roza Tórequlqyzy Aıtmatova qatysyp, tilektestigin bildirdi.
«Tarıhsyz halyq, tamyrsyz jer bolmaıdy» degendeı, bizdiń qyrǵyz halqynyń san ǵasyrlyq tarıhy bar. «Tarıhyńdy joqqa shyǵarsań, tamyrsyz bolasyń» dep atalarymyz aıtqandaı, tarıhymyzdy eshqashan umytpaýymyz kerek. Sondyqtan qyrǵyz halqy ata-babalarymyz ben búgingi berekeli ómirimizdiń negizin qalaǵan, halqymyzdyń atyn, kóne tilimizdi ǵasyrlar boıy saqtap, táýelsiz Qyrǵyz Respýblıkasynyń qurylyp, nyǵaıýyna dańǵyl jol salǵan tulǵalardyń jarqyn estelikterin saqtaýy kerek, -- «Rýh Beıne» halyqaralyq shyǵarmashylyq akademıasynyń prezıdenti Qaıyrgúl Joldoshbekqyzy.
Baıqaýǵa alpys eki shyǵarma kelip tústi. Baıqaýǵa qazaq, orys, túrik, ózbek elderi qalamgerleriniń týyndylary qatystyryldy. Komısıany belgili profesor, pedagogıka ǵylymdarynyń doktory, «Togolok Moldo» atyndaǵy ádebı syılyqtyń ıesi Sýlaıman Rysbaev basqardy. Jeńimpaz ben júldegerlerdi anyqtaý jasyryn jolmen júrgizildi. Júldeli 1-oryn tarazdyq J.Tolashqyzyna buıyrdy. 2-oryn túrkistandyq Ǵ.Bektóreev aldy. 3-oryndy aqtóbelik Saǵynǵalı Nuryshev ıelendi. Yntalandyrý syılyqtary aqyn Maqsuthan Barkól-Dáleıuly men Gúljanat Shonabaıǵa berildi. Jeńimpazdar men júldegerler qurmet gramotasy men aqshalaı syılyqpen marapattaldy.
Qyrǵyzstanǵa sapar shekken qazaq delegasıasynyń quramynda Almatydaǵy Chaıkovskıı atyndaǵy mýzykalyq kolejdiń stýdenti Mádı Myrzahan Moldabaıdyń ánin áýeletip, zor daýsymen qyrǵyz aǵaıyndardy tánti etti. Mádı bir ǵasyr buryn qara dombyrasymen Parıjde án salǵan Ámire atasynyń jolyn qaıta jańǵyrtqandaı.