Adamnyń sýreti kelisimsiz jarıalansa, aıyppul tóleıdi.
Tipti keı jaǵdaıda bas bostandyǵynan aıyrylýy da múmkin, dep habarlaıdy aqshamnews.kz
Zań boıynsha qoǵamdyq oryndarda foto, vıdeo túsirýge tyıym salynbaǵan. Biraq materıaldy paıdalanýǵa qatysty shekteýler bar.
Konstıtýsıanyń 20-babyna sáıkes, árkimniń zań júzinde tyıym salynbaǵan kez kelgen tásilmen erkin aqparat alýǵa jáne taratýǵa quqyǵy bar. Bul degenimiz, shyǵarmashylyq pen sóz erkindigine kepildik berilgen. Biraq bireýdiń sýretin kelisimsiz paıdalaný adamnyń quqyǵyn buzady. Osylaısha, qoǵamdyq jerde eshbir shekteýsiz foto men vıdeo jasaýǵa bolady. Al kadrǵa bireý kirip ketse, sol adamnyń kelisimi kerek. Sebebi ol adam óziniń sýretin paıdalanýǵa qarsy bolýy múmkin.
Azamattyq kodekstiń 145-babynda adamnyń óz beınesine quqyǵy bekitilgen.
"Qandaı da bir adamnyń sýrettik beınesin onyń kelisiminsiz, al ol qaıtys bolǵan jaǵdaıda muragerleriniń kelisiminsiz paıdalanýǵa eshkimniń de quqyǵy joq", - delingen zańda.
Birneshe jaǵdaıda qoǵamdyq orynda túsirilgen sýretti kelisimsiz jarıalaýǵa bolady. Olar:
oıyn-saýyq, mádenı-buqaralyq jáne sporttyq is-sharalarda halyqtyń arasynda júrip, fotoǵa túsip qalý;
adamnyń bet-beınesi men qyzmetine qatysty málimetterdi ashyq jarıalanýy;
beınelenetin adamdy paıdalaný konstıtýsıalyq qurylysty qorǵaý, qoǵamdyq tártipti, adamnyń quqyqtary men bostandyqtaryn, halyqtyń densaýlyǵy men ımandylyǵyn saqtaý maqsatynda júzege asyrý;
adam aqy alyp, foto-vıdeoǵa tússe, kelisim alýdyń qajeti joq.
Adamnyń sýreti kelisimsiz jarıalansa, zań boıynsha aıyppul qarastyrylǵan. Al jekemenshik aımaqta túsirilgen foto men vıdeo úshin qylmystyq is qozǵalýy da múmkin. Sebebi ondaı áreket adamnyń ómirine qolsuǵýshylyq bolyp sanalady.
Qylmystyq kodekstiń 147-baby, 2-bóligi (Adamnyń jeke nemese otbasy qupıasyn quraıtyn, jeke ómiri týraly málimetterdi onyń kelisiminsiz zańsyz jınaý ne ózge de derbes derekterdi zańsyz jınaý jáne (nemese) óńdeý (taratýdy qospaǵanda) nátıjesinde adamnyń quqyqtary men zańdy múddelerine eleýli zıan keltirý) boıynsha birneshe jaza qarastyrylǵan.
Olar:
5 000 AEK-ke (18 460 000 teńgege) deıingi aıyppul;
túzetý jumystary;
800 saǵatqa deıingi merzimge qoǵamdyq jumystar;
úsh jylǵa deıingi merzimge bas bostandyǵyn shekteý;
úsh jylǵa deıin bas bostandyǵynan aıyrý.
Sot qylmystyq árekettiń aýyrlyǵyna qaraı bes jazanyń bireýin taǵaıyndaıdy.
Al qyzmet babyn nemese aqparatty jasyryn alýǵa arnalǵan arnaıy tehnıkalyq quraldardy paıdalana otyryp jasalǵan ondaı áreket úshin bes jylǵa deıin bas bostandyǵynan aıyrý jazasy qarastyrylǵan.