Almatyda Shamǵon Saǵaddınuly Qajyǵalıevtiń jáne Tiles Shamǵonuly Qajyǵalıevtiń qurmetine memorıaldyq taqta ashyldy.
Almatyda kásibı dırıjer, kórnekti qaıratker, KSRO Halyq artısi, HH ǵasyrdaǵy qazaq mýzykasynyń qaıtalanbas birtýar alyp tulǵalarynyń biri Shamǵon Saǵaddınuly Qajyǵalıevtiń jáne kompozıtor, Qazaqstannyń eńbek sińirgen óner qaıratkeri Tiles Shamǵonuly Qajyǵalıevtiń qurmetine ornatylǵan memorıaldyq taqtanyń saltanatty ashylý rásimi ótti.
Memorıaldyq taqta Medeý aýdany, Qarasaı batyr jáne Pýshkın kósheleriniń qıylysyndaǵy kórnekti tulǵalar turǵan úıde ornatyldy.
Saltanatty rásimge Almaty qalasy ákimdiginiń ókili Arman Halbekov, Qurmanǵazy atyndaǵy Qazaq ulttyq halyq aspaptar orkestriniń dırektory Medet Qýanyshev, Qazaqstannyń eńbek sińirgen qaıratkeri Serik Jeksembekuly Erkimbekov jáne ózge de zıalylar, sondaı-aq qazaq qaıratkerleriniń týǵan-týystary qatysty.
- Búgin biz KSRO halyq artısi, HH ǵasyrdaǵy qazaq mýzykasynyń qaıtalanbas birtýar alyp tulǵalarynyń biri Shamǵon Saǵaddınuly Qajyǵalıev jáne kompozıtor, Qazaqstannyń eńbek sińirgen óner qaıratkeri Tiles Shamǵonuly Qajyǵalıevtiń turǵan úıine memorıaldyq taqta qoıý saltanatynda bas qosyp turmyz. Tiles Qajyǵalıev – qazirgi zamannyń daryndy kompozıtory. HH ǵasyrdyń ekinshi jartysyndaǵy Qazaqstannyń shyǵarmashylyq zıalylardyń kórnekti ókili. Dana halqymyz "Jaqsydan jaqsy týar jarqyldaǵan" dep beker aıtpasa kerek. Óner áleminiń qos tarlanynyń ónegeli ómiri, jarqyn beınesi, ǵıbraty mol eńbekteri halqymyzdyń jadynda máńgi saqtalady, – dedi Almaty qalasy ákimdiginiń ókili Arman Halbekov.
Sondaı-aq, búgin memorıaldyq taqta ashylý rásiminen keıin Qurmanǵazy atyndaǵy Qazaq ulttyq halyq aspaptar orkestriniń ǵımaratynda dırıjer, profesor, KSRO Halyq artısi, Memlekettik syılyqtyń laýreaty, «Otan», «Parasat» ordenderiniń ıegeri Shamǵon Saǵaddınuly Qajyǵalıevtiń 95 jyldyǵyna arnalǵan «Serpin atty keshi ótedi.
Aıta ketken jón, Shamǵon Saǵaddınuly Qajyǵalıev - kórnekti qaıratker, kásibı-maman, dırıjer. KSRO halyq artısi, «Otan», «Parasat» ordenderiniń ıegeri. HH ǵasyrdaǵy qazaq mýzykasynyń qaıtalanbas birtýar alyp tulǵalarynyń biri.
Sh.Qajyǵalıev 1944 jyly Almaty memlekettik konservatorıasyna oqýǵa túsip, 1947-1950 jyldary profesor I.A.Lesmannan skrıpka, Q.Jantileýovten dombyra, L.M. Shargorodskııden dırıjer mamandyǵy boıynsha dáris alady. Keıin E.Grıkýrovtan oqyp, bilimin tolyqtyrady. Eńbek jolyn 1946 jyly akademık A.Jubanovtyń asıstenti bolyp bastaıdy. Tabıǵat syılaǵan ǵajaıyp talanty, zor eńbekteri ony álemdik deńgeıge kóterip, zor eńbekteri ataq-dańqqa bóledi.
1966 jyly Lenıngrad konservatorıasyn Opera jáne sımfonıalyq dırıjerlaý mamandyǵy boıynsha támámdap, 1968-1971 jyldary aralyǵynda KazSSR Memlekettik Sımfonıa orkestrin basqarǵan. 1982 jyly ónerdegi tolaǵaı tabystary úshin Memlekettik syılyqtyń laýreaty ataǵy berilgen. 1967-1988 jyldary qazaq orkestrlerine kásibı maman dırıjerlardy oqytyp daıarlaý maqsatymen Almaty memlekettik konservatorıasynda kafedra ashyp meńgerýshi qyzmetin atqarǵan. 1952-1991 jyldar aralyǵynda Qurmanǵazy orkestriniń bas dırıjeri jáne kórkemdik jetekshisi, ári dırektory bolyp qyzmet atqarǵan. Sh.Qajyǵalıev elimizdiń mádenı ómirindegi kóptegen jańalyqtardyń jarshysy boldy. 1953 jyly Qurmanǵazy orkestri Býharestte ótken dúnıejúzilik festıválge qatysyp qazaq ónerine alǵashqy «Altyn» juldyzdy ákelgen.
1991-2005 jyldary Qaraǵandy oblysy, Q. Baıjanov atyndaǵy konserttik birlestiktiń shaqyrtýymen Táttimbet atyndaǵy orkestrdiń kórkemdik jetekshisi jáne bas dırıjeri qyzmetin atqarǵan.
2005-2015 jj. Almatyǵa oralyp, ómiriniń sońyna deıin óziniń súıikti ujymy - Qurmanǵazy orkestriniń kórkemdik jetekshisi qyzmetin atqardy.