Kópen Ámirbek ómirden ozdy

Tanymal satırık Kópen Ámirbek 73 jasqa qaraǵan shaǵynda ómirden ozdy. Qaraly habardy aqyn, Qazaqstan jazýshylar odaǵynyń múshesi Serik Seıitman jetkizdi, dep habarlaıdy Almaty-akshamy.kz.
«Kóńilderińizge kóp raqmet. Kópen aǵam bizdi tastap ketti...», - dep jazdy aqyn Facebook- paraqshasynda.
Kópen Ámirbek 1950 jyly 29 naýryzda Ońtústik Qazaqstan oblysynyń Otyrar aýdanyna qarasty Eshkiqora eldimekeninde dúnıege kelgen. Orta mektepti bitirgen soń Otyrardaǵy halyq teatrynda eńbek jolyn bastaǵan.
Ál-Farabı atyndaǵy Qazaq ulttyq ýnıversıtetiniń jýrnalısıka fakúltetin 1973 jyly bitirip, Qıyr shyǵysta eki jyldyq áskerı-partıa mektebinde oqyǵan.
1978 jyly Máskeýde, 1980 jyly Tashkentte ótken búkilodaqtyq jas syqaqshylar festıvaline qatysyp, «Pravda» baspasynan shyqqan «Nadeısá ı jdı», «Krohotnye zvezdy» atty orys tilindegi ujymdyq jınaqta ázil-syqaqtary jarıalanǵan.
Saıası-satıralyq «Ara-SHmel» jýrnalynda ádebı qyzmetker, bólim meńgerýshisi, jaýapty hatshy, bas redaktor, ǵylymı-tehnıkalyq «Bilim jáne eńbek» jýrnalynda jaýapty hatshy, «Qazaq ádebıeti» gazetinde satıra jáne ıýmor bóliminiń meńgerýshisi, «Egemen Qazaqstan» gazetinde feleton bóliminiń meńgerýshisi, Qazaqstan Respýblıkasy Bas prokýratýrasy men Joǵarǵy sotynda baspasóz hatshysy, Qazaq radıosynda bas redaktor bop qyzmet istedi.
Kópen Ámirbek «Qymyzhana», «Tamasha» oıyn-saýyq otaýynyń belsendi avtory retinde, sondaı-aq ózi qurǵan «Kópen kele jatyr!...» atty satıralyq teatrymen kórermenge keńinen tanyldy. Orys ádebıetiniń klasıkteri I.Krylov, S.Mıhalkov, S.Marshaktyń mysal-mysqyldary men lezgın satırıgi Jamıdınniń jáne ózbek ázilkeshi Abdýlla Qahardyń birsypyra syqaq óleńderin qazaq tiline aýdardy. «Aty joq kitap», «Alyp», «Tilim qyshyp barady», «Qysyr áńgime», «Myń bir mysal», «Aýyzbastyryq», «Ózińdi tanısyń ba?», «Kópen kele jatyr!...», «İz», «Kókemniń kózi», «Pa, shirkin, parodıa!...» atty ázilsyqaq, syn maqalalar kitabynyń avtory.
Prezıdent granty men «Parasat» ordeniniń ıegeri, Halyqaralyq «Alash» ádebı syılyǵynyń laýreaty.