Kóktaıǵaqtyń aldy alý júzege asýda
Almaty ákimdiginiń málimetinshe, qalalyq kóriktendirý qyzmetteri sý tasqyny men kóktaıǵaqtyń aldyn alý boıynsha táýlik boıy jumys istep jatyr, dep habarlaıdy Almaty-akshamy.kz.
«8-9 qarasha kúnderi ál-Farabı dańǵylynyń joǵary jaǵyna 8-10 sm qar tústi. 9 qarasha kúni saǵat 7:00-de taýly aımaqta túsken qardyń deńgeıi 15-20 sm-ge jetti. Aıdyń basynan beri qalada 36,6 mm jańbyr jaýdy, normasy – 50 mm. Túngi ýaqytta 8-9 qarasha aralyǵynda 285 arnaıy tehnıka, onyń ishinde 68 qum sepkish jáne 357 jol jumysshysy jumyldyryldy», - delinedi ákimdiktiń habarlamasynda.
Sondaı-aq, taýly aımaqta jáne taý bókterinde kóktaıǵaqtyń aldyn alý maqsatynda joldarǵa ınertti materıaldar sebildi jáne tazalaý júzege asyryldy. Kóktaıǵaqqa qarsy 763 tonna materıal paıdalanyldy. Sondaı-aq, qalanyń joǵarǵy bóliginde trotýarlar men qoǵamdyq kólik aıaldamalaryn qardan tazartý jumystary júrgizilip jatyr.
«9 qarasha kúni tańerteń qala joldaryn tazartýǵa 377 tehnıka, onyń ishinde 77 qum sepkish jáne 1 129 jol jumysshysy jumyldyryldy. Qazirgi ýaqytta qalada joldar men trotýarlardy japyraqtardan tazartý jumystary júrgizilip jatyr. Aýdan ákimdikterinde jumys barysyn baqylaý boıynsha táýlik boıy kezekshilik uıymdastyryldy. «Qazgıdromettiń» boljamy boıynsha, búgin túnde jańbyr jaýyp, arty qarǵa ulasýy múmkin. Túnde jeldiń jyldamdyǵy 3-8 m/s jáne aýa temperatýrasy 0-2 aıaz kútiledi», - dep habarlady ákimdikten.
Sondaı-aq, ákimdiktegiler joldyń qozǵalys bóliginde kóktaıǵaq bolý qaýpine baılanysty júrgizýshilerdiń jyldamdyqty tómendetip, avtokólikter arasyndaǵy qashyqtyqty arttyryp, jyldam manevr men tejeýler jasamaǵany jón ekenin eskertti.