Bóbekjaı ishi tolyqtaı zamanaýı materıaldyq bazamen qamtylǵan.
Qazaqstan Respýblıkasy Konstıtýsıa kúni jáne Bilim kúni qarsańynda Baqbaqty aýylynda 84 oryndy bóbekjaı saltanatty túrde ashyldy. Buryn táýelsizdik alǵan jyldary qaraýsyz qalǵan nysan ótken jyly aýyl turǵyndarynyń ótinishine sáıkes bóbekjaı bolyp ashylýǵa sheshim qabyldanǵan bolatyn, dep habarlaıdy Almaty-akshamy.kz Jetisu Media-ǵa silteme jasap.
Bóbekjaıdy qaıta qalpyna keltirý úshin memleket tarapynan 367.2 mln. teńge bólindi. Bólingen qarjyny maqsatty jumsap, kúrdeli jóndeý jumysyn sapaly júrgizgen “Golden siti“ JSHS-i nysandy merziminde aıaqtaǵan.
Bóbekjaıdyń ashylý saltanatyna qatysqan aýdan ákiminiń orynbasary Bórihan Ábdibaev jınalǵan kópshilikti Konstıtýsıa kúnimen jáne bóbekjaıdyń ashylýymen quttyqtap, óńirdegi mektepke deıingi tárbıe salasyndaǵy atqarylyp jatqan jumystarǵa toqtaldy.
«Balalardy mektepke deıingi tárbıemen qamtý maqsatynda aýdan boıynsha 8 balabaqsha jáne 14 shaǵyn ortalyq jumys jasap, balabaqshalarda 935, shaǵyn ortalyqta 600, barlyǵy – 1535 búldirshin tárbıelenýde. 3-6 jas aralyǵyndaǵy búldirshinderdi qamtý 99,3 paıyz boldy. Oblys boıynsha 95,6 paıyz eskersek, bul baǵytta aýdanymyzda ilgerileý bar» deı kele, jınalǵan qaýymdy aldaǵy kele jatqan jańa bilim kúnimen de quttyqtap ótti.
Bóbekjaıdyń ashylýyna aýdandyq bilim bóliminiń basshysy Aıman Aımuhanbet, aýdandyq ishki saıasat bóliminiń basshysy Gaýhar Amanjolova, Baqbaqty aýylynyń ákimi Aıdarhan Túımebaev, aýyl ardagerleri, turǵyndary, mektep ustazdary men bóbekjaı ujymy qatysty.
«Mektepke deıingi tárbıemen qamtýǵa qol jetkizýdegi oryn tapshylyǵyn qysqartý maqsatynda 1-3 jas aralyǵynda búldirshinderdiń paıyzyn kóterý maqsatynda osy Baqbaqty aýylynda 84 orynǵa arnalǵan bóbekjaıdyń ashylýy arqyly alda 85 paıyzdan 89 paıyzǵa kóteriletin bolady», - dep atap ótti aýdandyq bilim bóliminiń basshysy A.Aımuhanbet.
«Aýyl turǵyndarynyń ótinishin eskerip, osy ǵımaratty memleket qaramaǵyna alyp, ony qaıtadan qalpyna keltirý úshin qomaqty qarjy bólýge yqpal jasaǵan aýdan ákimi Ǵalym Toqpeıisovke, aýdandyq bilim bóliminiń basshysy Aıman Aımuhanbetke, osy saladaǵy barsha jaýapty mamandarǵa aıtar alǵysymyz sheksiz», - deıdi «Kúnshýaq» bóbekjaıynyń ádiskeri Jazıra Qazybekova.
El tilegimen ashylǵan bóbekjaı aldaǵy merzimderde halyqtyń kóńilinen shyǵatyn tabystar bıiginen kórinetinine senimimiz mol.