Qaraǵandyda bıznes ókilderiniń suraqtaryna jaýap bere otyryp, Májilis depýtaty Azat Perýashev AES jobasy jańa jumys oryndaryn ashyp, ınjenerlik ınfraqurylymnyń damýyna serpin beretinin málimdedi.
Atom energetıkasy uzaq merzimdi perspektıvada elektr energıasynyń turaqty baǵasyn qamtamasyz etedi, dep jazady inkaraganda.kz.
Bul, ásirese, Qazaqstan ekonomıkasynyń básekege qabilettiligin arttyrý jáne ónerkásiptiń damýy úshin mańyzdy.
«Qazirgi ýaqytta eýropalyq elder «kómirtek iziniń» problemasyna qatty alańdaýda, olar kómirmen jumys isteıtin elektr stansıalaryn birtindep jaýyp jatyr. Al kómir stansıalarynan óndirilgen energıamen shyǵarylatyn taýarlarǵa qosymsha salyqtar salynady. Bul otandyq óndirýshilerge úlken shekteýler qoıady, olardyń eksporttyq ónimderi básekege qabiletsiz bolyp, kiristeri azaıady», – dep atap ótti Perýashev.
Onyń pikirinshe, qazaqstandyqtar álemdik energetıkanyń ozyq tehnologıalaryn qoldanýy kerek jáne zamanaýı ǵylymı-tehnologıalyq tájirıbelerdi meńgerýi tıis.
«Qazaqstan órkenıetten artta qalmaýy tıis. Biz atom elektr stansıasyn sala almaımyz nemese bilikti mamandar joq degen pikirmen múldem kelispeımin. Qazaqstanda myńdaǵan stýdentter, onyń ishinde shetelde de, atom energetıkasyna qatysty mamandyqtar boıynsha bilim alýda. Olar Óskemendegi Úlbi metalýrgıalyq zaýytynda, Qytaıǵa eksporttalatyn ıadrolyq otyn óndiriletin jerde, Almatydaǵy Iadrolyq fızıka ınstıtýtynda, sondaı-aq Kýrchatovtaǵy Ulttyq ıadrolyq ortalyqta tájirıbeden ótýde», – dep túsindirdi depýtat.