Dárigerler AES salýdyń ekologıalyq jaǵdaıdy jaqsartýǵa yqpal etetinine qyzyǵýshylyq tanytty, sebebi ult saýlyǵy úshin óndiristen zıandy zattardyń az bólinýi mańyzdy.
Mundaı pikir almasý Aqtóbe oblysyndaǵy Mártók aýdandyq Halyqtyq shtabtyń aýdandyq ortalyq aýrýhana ujymymen kezdesýinde órbidi.
Shtab múshesi Qydyrbaı Shýdabaevtyń aıtýynsha, atom elektr stansalary qorshaǵan ortany tútin gazdary, kúl jáne munaı ónimderimen lastamaıtyndyǵy sarapshy mamandardyń dáleldi pikirleri arqyly rastalǵan. Ol álemdegi damyǵan jáne damýshy elderdiń AES paıdalaný tájirıbesin mysalǵa keltirdi.
AMANAT partıasynyń Mártók aýdandyq fılıaly tóraǵasy Anýar Iskarın energetıka mamandarynyń ıadrolyq energıany «jasyl» dep tanıtynyn atap ótti. Onyń sózinshe, AES kómir jáne gaz stansalarymen salystyrǵanda aıtarlyqtaı az zıandy shyǵaryndylarǵa ıe jáne ekologıalyq jaǵynan taza energıa kózi bolyp tabylady.
Kezdesýde sonymen qatar aýdannyń elektr energıasyna baılanysty máseleleri de kóterildi. Anýar Iskarınniń aıtýynsha, Mártók aýdanynda elektr jelileriniń 80 paıyzynyń tozýy sebepti aýa raıynyń qolaısyzdyǵy kezinde jıi jaryq óshedi. Bul jaǵdaıdy túzetý úshin qomaqty qarajat qajet, al qazir elimiz 100 mlrd teńgeden astam qarajatqa ózge elderden energıa satyp alýda. Elektr energıasyn tutyný kóleminiń jyl saıyn artyp kele jatqanyn da eskergen jón.