Baǵa óspeıdi
Ertis óńirinde komýnaldyq qyzmet pen turmystyq qajettiliktegi kómir baǵasy óspeıtin boldy, dep habarlaıdy Almaty-akshamy.kz
Baǵa ótken jylǵy kórsetkishke sáıkes bolmaq. Sala mamandarynyń habarlaýynsha, osyndaı kelisimge energıa taratýshy uıymdar kelgen. Al aımaqtyń turǵyn úı-kommýnaldyq qyzmet ókilderi halyqty kómirmen qamtıtyn kásiporyndarmen memorandýmǵa qol qoıǵan.
Maqsat - ishki naryqtaǵy qatty otyndy qymbattatpaý jáne óndiris kólemin azaıtpaý. Qazirgi ýaqytta naryqtaǵy qatty otyn baǵasy turaqtalǵan. Tapshylyq joq. Kenishten shyǵarylatyn kómirdiń bir tonnasynyń baǵasy 7500 teńgeni quraıdy.
Tasymaldaý shyǵyndary esepke alynsa, 8 myńnan 20 myń teńge aralyǵynda saqtalady. Bul - ótken jylǵy kórsetkish. Atalǵan másele qala-aýdan ákimderiniń jiti baqylaýynda bolmaq.
Sonymen qatar, naryqtaǵy baǵa boıynsha monıtorıń turaqty júrgiziledi.
Baǵany negizsiz kóterý derekteri tirkelse, qatań jaza qoldanylmaq.
– Kómir óndirisi suranysqa saı ulǵaıyp keledi. Oblys suranysy boıynsha byltyr 105 myń tonna qatty otyn shyǵaryldy. Bul – buryn-sońdy bolmaǵan kórsetkish. Óndiristik qýattylyǵymyzdy arttyrýǵa múmkindik bar. Al baǵa ózgermeıdi. Máselen, eki jyl buryn temirjol boıyn tasymaldanatyn kómirdiń tonnasy 7600 teńge kóleminde bolsa, bıyl 6335 teńgege arzandatyldy, - dedi kómir óndirýshi kásiporyn basshysy Nurlan Ahmetbaev.