Aıaǵyn jaza basyp, qylmysty bolǵan jasóspirimder de qoǵamnan tys qalmaıdy, orta bilim alady, atestat ıelenedi.
Almaty qalasynyń Qylmystyq atqarý júıesi departamentine qarasty LA- 155/6 mekemesinde jazasyn ótep jatqan jetkinshekter orta mektepti bitirgeni týraly atestat aldy.
Túzeý mekemesindegi saltanatty jıyn da elimizdiń Ánuranymen bastaldy. Ortaǵa 11-synypty bitirýshi túlekter synyp jetekshilerimen shyqty.
LA-155/6 mekeme bastyǵynyń orynbasary, ádilet maıory Dáýren Mashımbaev kolonıa ishinde bilim beretin mektepti bitirip jatqan jetkinshekterdi merekemen quttyqtap, bolashaqta jaqsy azamat bolyp shyǵatyndyqtaryna senim bildirdi. Mekteptiń oqý jáne tárbıe jónindegi orynbasarlary Lúdmıla Vasılevna men Aızada Ábdimádıqyzy da lebizin jetkizdi. Bas bostandyǵynan aıyrylyp, túzeý mekemesinde jazasyn ótep jatqan jasóspirimder arasynda bıyl qazaq bóliminen 11-synypty 11 bala, al orys bólimin 1 oqýshy bitirip, qoldaryna orta bilim týraly atestat alyp, qýanyshqa bólendi. Al 4 ekpindi oqýshy Maqtaý qaǵazymen marapattaldy.
Saltanatty is-shara konserttik baǵdarlamamen jalǵasyp, án-jyrmen órnekteldi. Kókke túrli-tústi sharlar ushyryldy. Balalardyń ózderi temir torly qorshaýdyń ishinde júrse de, olardyń asqaq armany jazylǵan sharlar esh kedergisiz aspan álemine jol tartty.