Bul týraly QR Premer-Mınıstriniń orynbasary Eraly Toǵjanov aıtty.
Parlamenttik tyńdaýda sý rersýrstaryn damytýdyń keleshegi týraly baıandama jasaǵan vıse-premer jańa Sý kodeksinde qandaı negizgi baǵyttar redaksıaǵa ushyraıtynyn aıtty, dep habarlaıdy Almaty-akshamy.kz QazAqparatqa silteme jasap.
«Sý kodeksiniń jańa redaksıadaǵy negizgi baǵyttary:
Birinshi. Eldiń sý-resýrstyq áleýetin saqtaý.
Ekinshi. Sý paıdalanýshylardy sý únemdeý tehnologıalaryn paıdalanýǵa yntalandyratyn tetikterdi aıqyndaý.
Úshinshi. Monıtorıńti sıfrlandyrý, Qazaqstannyń sý resýrstary áleýetin esepke alý jáne boljaý, sondaı-aq sý resýrstaryn basqarýdaǵy ǵylymnyń rólin arttyrý.
Tórtinshi. Ulttyq zańnamany halyqaralyq quqyq prınsıpterimen úılestirý», - dedi Eraly Toǵjanov.
Onyń sózine qaraǵanda, jańa Sý kodeksiniń jáne ilespe zań jobasynyń tujyrymdamalary ázirlengen. Endi zań jobalarynyń taraýlary men baptary daıyndalyp jatyr.
«Kodeks jobasy qyrkúıekte Prezıdent Ákimshiligine, 2023 jyldyń birinshi jartyjyldyǵynda Parlament Májilisine engiziledi», - dedi Úkimet basshysynyń orynbasary.
Májilis tóraǵasy Erlan Qoshanovtyń málimeti boıynsha, 2040 jylǵa qaraı Qazaqstanda sý tutyný 46 paıyzǵa artady.