Ádilet vıse-mınıstri Alma Muqanovanyń aıtýynsha, qazir Qylmystyq kodekste kolektorlyq agenttik qyzmetkeriniń óz ókilettikterin asyra paıdalanǵany, qaryzdy óndirip alýdyń zańsyz ádisterin qoldanǵany, qarjylyq qyzmetterdi tutynýshylardyń quqyǵyn buzǵany jáne taǵy basqa áreketter úshin jaýapkershiligin kózdeıtin arnaıy bap joq.
«Bul rette Qylmystyq kodekstiń 214 jáne 223-baptary kolektorlardyń tek kolektorlyq qyzmetpen tirkeýsiz aınalysqany úshin, sol sıaqty eger bul áreketter azamatqa, uıymǵa nemese memleketke iri zalal keltirse ne iri mólsherde tabys tabýmen ushtasady. Sondaı-aq kolektorlyq qyzmettiń qupıasyn jarıa etkeni úshin ǵana jaýaptylyqqa ákep soǵady», - dep sanaıdy ádilet vıse-mınıstri.
Onyń aıtýynsha, kolektorlyq agenttik qyzmetkeriniń óz ókilettigin qyzmetiniń mindetterine qaıshy jáne artyqshylyqtar alý maqsatynda paıdalanýy qoǵamǵa qaýipti is-áreket retinde baǵalanýy kerek.
Osyǵan baılanysty mınıstrlik kolektorlyq agenttik qyzmetkerlerin óz ókilettikterin teris jáne asyra paıdalanǵany úshin qylmystyq jaýapkershilikke tartýdy usynyp otyr.
«Bul shara zańdyq saýatsyzdyqqa baılanysty kolektorlyq agenttik qyzmetkerleriniń qysymyna jáne aıla-sharǵysyna ushyraýy múmkin azamattardyń quqyqtary men múddelerin qorǵaýdy qamtamasyz etýge múmkindik beredi», - dedi Muqanova.
Aıta ketcek, búgin májiliste ádilet mınıstrligi keıbir zańnamalyq aktilerge Qylmystyq, Qylmystyq-prosestik jáne Qylmystyq-atqarý kodeksterin ońtaılandyrý máseleleri boıynsha ózgerister engizý týraly zań jobasyn tanystyrdy.