Almaty polısıasy kólikti qaıta jabdyqtaý týraly aıtyp berdi.
Erejege sáıkes, qaıta jabdyqtaý – avtomobıldiń konstrýksıasynda kózdelmegen jáne jol qaýipsizdigine áser etetin bólshekter men kerek-jaraqtardy alyp tastaý nemese ornatýdan turady, dep habarlaıdy Almaty-akshamy.kz.
«Kólik quralynyń konstrýksıasyna bolashaqta ózgerister engizý týraly kelisimge kelý úshin ótinish berýshi bizdiń bólimshege jazbasha ótinish berýi kerek. Sondaı-aq, egov.kz, E-Ótinish elektrondy úkimet portalyn paıdalanyp, avtokólikti qaıta jabdyqtaýǵa ruqsat ala alasyz. Mundaı ótinishti qaraý nátıjesinde kólik quralynyń konstrýksıasyna usynylǵan ózgeristerdi engizý múmkindigi týraly sheshim qabyldanady. Avtokólikti durys qaıta jabdyqtaý úshin sáıkestikti baǵalaýdan ótken komponentterdi paıdalaný qajet. Sonymen qatar Keden odaǵynyń TR KO 018/2011 “Dóńgelekti kólik quraldarynyń qaýipsizdigi týraly” tehnıkalyq reglamentiniń talaptaryn (№877 2011 jylǵy 09 jeltoqsandaǵy Keden odaǵy komısıasynyń sheshimimen bekitilgen) jáne Qazaqstan Respýblıkasynyń ST QR 1418-2018 Avtomoto kólik quraldary. Konstrýksıaǵa ózgerister engizý. Jalpy erejeler men tehnıkalyq talaptar» saqtaýdy qamtamasyz etý qajet», – dedi Almaty qalalyq PD ákimshilik polısıa basqarmasynyń bastyǵy Asqat Qulbaev.
Avtokóliktiń konstrýksıasyna sáıkes ózgerister avtomobıldiń tirkeý qujattaryna engizilýi kerek. Avtokólikke engizilgen ózgertýler týraly aqparat kólik quralyn tirkeý kýáliginde kórsetilýi qajet.
«Kólik quralynyń tirkeý kýáligine kólik quralyna ózgertýler engizý úshin qaıta jabdyqtalǵannan keıin mamandandyrylǵan halyqqa qyzmet kórsetý ortalyǵyna júginý qajet. Ol jerde ákimshilik polısıanyń aýmaqtyq bólimshesi beretin avtokóliktiń konstrýksıasyna engizilgen ózgeristerdiń qaýipsizdik talaptaryna sáıkestigi týraly anyqtamany usyný qajet. Bul kólik quralyn tirkeý kýáligin aýystyrý arqyly kólikti odan ári paıdalanýǵa múmkindik berý úshin jasalyp otyr», – dedi Qulbaev.