Bul týraly Qazaqstandaǵy AQSH Dıplomatıalyq mısıasy málimdedi.
Bas konsýl Erkinniń konsýldyq aımaǵyna Almaty jáne Shymkent qalalary, sondaı-aq Almaty, Qyzylorda, Túrkistan, Jambyl jáne Jetisý oblystary kiredi, dep habarlaıdy Almaty-akshamy.kz
"Men Almatydaǵy AQSH Konsýldyǵynyń atynan ókildik etýdi ózim úshin úlken mártebe sanaımyn jáne Qazaqstan sıaqty ádemi ári qonaqjaı elge qaıta oralǵanyma óte qýanyshtymyn. Almaty 20 jyl buryn meniń sheteldegi alǵashqy dıplomatıalyq mısıam bolǵan. Endi aldaǵy úsh jyl boıy bul qalany óz úıim dep sanaý baqytyna ıe bolyp otyrmyn. Sol ýaqyttan beri kóp nárse ózgergen , sondyqtan Qazaqstandy jańa qyrynan tanyp-bilýge asyqpyn», - dedi Erkin hanym.
«Men sizdermen birge Qazaqstannyń ekonomıkasyn nyǵaıtyp, ártaraptandyrý, óńirlik qaýipsizdikti kúsheıtip, mádenı almasýdy damytý úshin kúsh jumyldyryp eńbek etetin, jáne eń bastysy, Qazaqstannyń eń qundy baılyǵy – onyń halqymen ıyq tirese jumys isteıtin sátterdi qýana kútemin», - dep atap ótti Erkin hanym.
Dıplomatıalyq qyzmettegi 20 jyl boıy Erkin hanym álemniń ártúrli elderin aralap úlgerdi. Buǵan deıin ol Reıkávıktegi (Islandıa) AQSH Elshiliginde mısıa basshysynyń orynbasary jáne ýaqytsha senimdi ókil qyzmetterin atqardy. Erkin hanymnyń oǵan deıingi dıplomatıalyq qyzmet atqarǵan elderiniń qatarynda Panama-Sıtı (Panama), Bishkek (Qyrǵyzstan), San-Salvador (Salvador) jáne Máskeý (Reseı) de bar. Erkin hanym Vashıngton qalasynda birneshe ret qyzmet atqardy, atap aıtqanda, Ekonomıkalyq jáne iskerlik máseleler búrosy (EB), Qarý-jaraqty baqylaý, kelisimderdi tekserý jáne oryndaý búrosy (AVC) jáne Batys jarty shar isteri búrosynda (WHA) jumys istedi.
Mıshel Erkin hanym Iel ýnıversıtetin Reseı jáne Shyǵys eýropalyq zertteýler mamandyǵy boıynsha úzdik bitirgen. Sodan keıin ol Mınnesota ýnıversıtetiniń zań mektebiniń Iýrısprýdensıa doktory (JD) dárejesin aldy.
Soltústik Mınnesotanyń aýyl sharýashylyǵymen aınalysqan ortasynan shyqqan ol óziniń Aq Jer Odjıbve (Chıppeva) taıpasynyń urpaǵy ekendigin maqtan tutady. Erkin hanym men joldasy Jomart tórt bala tárbıelep otyr. Orys jáne ıspan tilderin jetik meńgergen, qazaq tilin de oqyp júr.