Skrınıngtik tekserýler baǵdarlamasyn iske asyrý sheńberinde Densaýlyq saqtaý mınıstrligi ulǵaıý jaǵyna qaraı erte anyqtaýǵa jatatyn aýrýlardyń tizbesin qaıta qarady, dep habarlaıdy almaty-akshamy.kz.
Sonymen, balalar men óskeleń urpaq úshin ómirdiń mańyzdy kezeńderinde mindetti profılaktıkalyq tekserýler keńeıtilip, engizildi: ómirdiń 1-shi jyly, balabaqshaǵa barar aldynda (3 jyl), mektepke barar aldynda jáne jasóspirim kezinde, bala fızıologıalyq ózgeristerge ushyraǵan kezde (14-15 jáne 16-17 jas).
Ómirdiń birinshi jylynan bastap balalarǵa profılaktıkalyq tekserý maqsatynda hırýrgtyń nevropatologtyń oftalmologtyń (kórý ótkirligi), otorınolarıngologtyń (aýdıologıalyq tekserýler) qarap-tekserýi júrgiziledi.
Elimizdiń eresek turǵyndarynyń nysanaly tobynyń arasynda 8 aýrýdy: arterıalyq gıpertenzıany, júrektiń ıshemıalyq aýrýyn, qant dıabetin, glaýkomany, jatyr moıny obyryn, sút bezi obyryn, kolorektaldyq obyrdy, vırýstyq gepatıtti erte anyqtaýǵa skrınıngtik (profılaktıkalyq) tekserýler júrgiziledi.
Sonymen qatar, koronavırýs ınfeksıasy kezeńin jáne aýyl men qala turǵyndarynyń arasynda medısınalyq kómek kórsetýdegi anyqtalǵan teńgerimsizdikti eskere otyryp, búırek, asqazan-ishek joldary, tynys alý aǵzalary jáne qýyqasty bezi obyry aýrýlaryn erte anyqtaý úshin aýyl turǵyndarynyń arasynda profılaktıkalyq tekserýler keńeıtildi. Sondaı-aq, alǵash ret 18 jastan 29 jasqa deıingi jas turǵyndardy profılaktıkalyq tekserýlermen qamtý engizildi.
Osylaısha, búginde qala halqynyń nysanaly toby úshin 8 aýrýdy erte anyqtaýǵa, aýyl turǵyndary úshin 12 aýrýdy erte anyqtaýǵa profılaktıkalyq (skrınıngtik) tekserýler júrgiziledi.
Bul rette 2023 jyldyń ótken 9 aıynda elimizde 2,8 mln.eresek adamǵa profılaktıkalyq (skrınıngtik) tekserýler júrgizildi, 388 myń adamǵa túrli aýrýlar anyqtaldy, 220 myń adam dıspanserlik esepke alyndy.
Sonymen qatar, 2023-2027 jyldarǵa arnalǵan onkologıalyq aýrýlarmen kúres jónindegi keshendi jospar bekitildi, onyń sheńberinde jasandy ıntellekt tehnologıasymen jáne zamanaýı tehnologıalarmen tómen dozaly kompúterlik tomografıa negizinde ókpe obyryn erte anyqtaýdy zertteý kózdelgen.
Halyqtyń arasynda profılaktıkalyq tekserýlerden ýaqtyly ótý aýrýlardyń erte profılaktıkasyna jáne múgedektiktiń aldyn alýǵa yqpal etedi.