Bul týraly Almaty qalasynyń ákimi E.Dosaevtyń Medeý aýdanynyń turǵyndarymen kezdesýinde aıtty, dep habarlaıdy Almaty-akshamy.kz.
Qazirgi ýaqytta «Esentaı» ózenin abattandyrý jobasy aıasynda Kishi Almaty ózeniniń 3-shi kezegi boıynsha sý bólgishten «Medeý» keshenine deıin jalpy uzyndyǵy 6,2 shaqyrym jerde jumystar júrgizý josparlanǵan.
Jobada jaıaý júretin joldar, demalys aımaqtaryn qurý, kógaldandyrý, jaryqtandyrý, jańa shaǵyn sáýlettik nysandardy ornatý jáne t.b. qarastyrylǵan. Qurylys-montajdaý jumystary kelesi jyldyń İİ toqsanynda bastalady.
Qoǵamdyq keńistikti damytý sheńberinde Kishi Almaty ózeni boıymen Terenkýrdaǵy sý aıdynynyń joǵarǵy bóligin memleket menshigine qaıtarý prosedýralary júrgizilýde. Balansqa qabyldanǵannan keıin bógetti nyǵaıtý jáne kópshilik unatatyn orynnyń aýmaǵyn abattandyrý boıynsha jeke joba ázirlenetin bolady. Jobalaý-smetalyq qujattama 2023 jyldyń IIİ toqsanynda aıaqtalady.
Jaıaý júretin belgili joldarǵa erekshe nazar aýdarylǵan. Búgin «Kóktóbe» saıabaǵynda qala turǵyndary men qonaqtary joldyń boıymen júrýge májbúr. Bul joldaǵy barlyq adamdarǵa qolaısyz jáne qaýipti. Turǵyndardyń ótinishterin eskere otyryp, kelesi jyldyń III toqsanynda jaıaý júretin adamdarǵa densaýlyq joly salynady.