QR Ulttyq kitaphanasynyń Úlken zalynda «Tulǵa bolamyn» atty respýblıkalyq kitap oqý saıysynyń qorytyndysy ótti.
Atalmysh is-sharany «Shuǵyla» qory men «Darıa» damytý ortalyǵy uıymdastyrǵan. Osymen 3-shi ret uıymdastyrylyp otyrǵan sharaǵa 120 myńnan astam adam qatysqan. Saıysta mektep oqýshylarynyń arasyndaǵy aqparattyq qoldaýdy Respýblıkalyq ǵylymı-pedagogıkalyq kitaphanasy júzege asyrdy. Saıysqa 4 oqýshylar jáne 1 eresekter toby baq synasqan.
«Jalpy, qaı kezeńde bolmasyn, qazaq qoǵamy aǵartýshylyqqa kóńil bólgen. Mektep joq kezeńderde mektepter salynyp, aýyl balalaryn mektepte oqytqan. Ár zamannyń baılar ınstıtýty bolǵan. Qazirgi tańda olardy demeýshiler dep aıtamyz. Memleketten eshqandaı qarjy almaı-aq, 120 myń bala qatysatyn shara uıymdastyratyn. Bul jobadan bilim de alyp, jeńiske de jete alasyzdar. Máshhúr Júsiptiń mynandaı bir sózi bar: «Qudaıdyń jaqsylyǵy basyńda tur» deıdi. Rasymen-aq, mıymyzdy durys jumys istetýdiń arqasynda qanshama jetistikterge jetýge bolady. Kitap oqyp ósken urpaqtarymyz elimizdiń órkendeýine súbeli úles qosady dep senimmen aıta alamyn. Bul jobanyń bolashaǵy zor bolady degen senimdemin. Tek qazaq dalasyn qamtyp qana qoımaı, barsha túrki elderin qamtıdy degen senimdemin»,– deıdi Almaty qalasynyń Mádenıet basqarmasynyń basshysy Ǵanı Maılybaev.
Ár toptyń kitaptary da, júldeleri de bólek boldy. Saıysqa qatysýshylar qazaq ádebıeti men álem ádebıeti klasıkteriniń kitaptaryn oqýdan jarysty. Olardyń árqaısysy 3 kezeńde 3 kitapty oqyp bitirip, ár kezeńniń sońynda kitap boıynsha onlaın test tapsyrǵan.
«Saıystyń basty maqsaty – jastardyń kitap oqýǵa qushtarlyǵyn oıatý, oqýshylar arasynda kitap oqý daǵdysyn qalyptastyrý, ári jandandyrý. Sol arqyly tól qundylyqtarymyzdy jastarǵa nasıhattaý. Ótken maýsymnyń bas júldegerine Nur-Sultan qalasynan 1 bólmeli páter berildi. Saıystyń basty júldeleri: Ystambulǵa saıahat, MacBook, iPad, Apple Watch jáne basqa da baǵaly syılyqtar taratyldy. Bul saıys qazaq ádebıetin qoldap, onyń oqyrmandaryn kóbeıtý maqsatynda uıymdastyryldy. Kitap oqyǵan árbir azamat bolashaqta tulǵa bolady dep senimmen aıta alamyz»,– deıdi «Shuǵyla» qoǵamdyq qorynyń prezıdenti Sársenbek Imanbaev.
Saıysqa qatysý tegin boldy. 3 kezeńnen turatyn saıystyń birinshi maýsymyna 50 myń, ekinshi jáne úshinshi maýsymdaryna 120 myńnan astam saıysker tirkelgen. 3 maýsymda oza shapqandary Aıdana Qaıyrbekova, Aısha Kádirhan, Shynarbek Ersultan, Bolat Nurzada esimdi oqýshylar jeńimpaz atanyp baǵaly syılyqtarǵa ıe boldy.
İs-sharaǵa zıaly qaýym ókilderi, ádebıettanýshylar men BAQ ókilderi, mektep ustazdary men shákirtteri qatysty.