Búgin Qazaqstan musylmandary dinı basqarmasy Almaty ókildiginiń uıymdastyrýymen 25 qazan Ulttyq mereke qarsańynda «DASTUR FEST» kórmesi ótti, dep habarlaıdy almaty-akshamy.k
Din men dástúr dáriptelgen kórmeniń ashylý saltanatyna QMDB-nyń naıb múftıi Kenjeáli qajy Qońyratbaıuly, qoǵam qaıratkerleri Smaǵul Elýbaı, Marat Toqashbaev, Almaty qalasynyń bas ımamy Tólebı Ospan men basqa da zıaly qaýym ókilderi, meshit aqsaqaldary men jamaǵattary jáne ımamdar qatysty.
Bas múftı Naýryzbaı qajy Taǵanuly hazrettiń ystyq sálemin jetkizgen naıb múftı Kenjeáli qajy Myrzabaev jınalǵan halyqty quttyqtap, arnaıy sóz sóıledi. QR mádenıet qaıratkeri Islam Jemeneı men QR eńbek sińirgen qaıratkeri Qarakóz Súleımenova da barshany merekemen quttyqtap, din men dástúr sabaqtastyǵyn jańǵyrtyp júrgen Qazaqstan musylmandary dinı basqarmasynyń bastamasyna rızashylyqtaryn bildirdi.
Almaty Ortalyq meshitiniń aýlasynda ótken kórmeniń saltanatty ashylýynda batyrlar toby búrkit, naıza-shoqparymen óner kórsetse, ulttyq shapan men kımeshek sherýi salt-dástúrimizdiń ozyq úlgilerin pash etti.
Aq jaýlyqty analar shashý shashyp, kelinder kópshilikke baýyrsaq dámin usyndy. Aq boz attyń qulaǵynda erkin oınaǵan akter Madıar Serikbaev at ábzelderiniń ataýlary men qazaqy maǵynasyn túsindirip ótti.
Sonymen qatar temir ustasynyń kıimderi kópshilik nazaryna usynylyp, qazaq dástúrindegi tabaq tartý ádisin naǵyz maman jurtshylyqqa tanystyrdy. Aqyn, sazger Jáken Omarov dán men dástúr sabaqtastyǵyna arnaıy jazylǵan arnaýyn elge kúmbirlegen dombyra únimen jetkizdi. Kórmeniń kelesi kezeńinde táı-táı basqan búldirshinderdiń tusaýy kesilip, kelgen kópshilik qaýym ájelerdiń jún tútý, sabaý, jip ıirý taǵy basqa salt-dástúrlerdi oryndaýyn tamashalady.
Sondaı-aq kórmege ulttyq kıimder erler shapany, kımeshek, oramal, bas kıimderi jáne zamanaýı úlgidegi ulttyq kıimderdi dáriptep júrgen ataqty dızaınerlerdiń toptamalary el nazaryna usynyldy. Sáni men sapasy joǵary qazaqy kıimderdi kıip kórip, sol jerde satyp alýǵa múmkindik aldy. Kórmede aǵashtan oıyp jasalyp, naǵyz sheberdiń qolynan shyqqan túrli dombyralar, temir ustasy jasaǵan buıymdardy tamashalap, ulttyq taǵam túrlerinen dám tatýǵa bolady. «MUFTYAT» baspasynan shyqqan kitaptar da kórmege kórik qosty.
«Oqyrmanmen oı bólis» jobasy aıasynda ǵalym, PhD doktor Azamat Jamashev, PhD doktoranty Syrym Shakızada jáne ustaz Erlan Aqtaevtyń oqyrmandarmen kezdesýi ótti. Mereke aqsham namazyna deıin jalǵasty.
Ulttyq mereke qarsańynda uıymdastyrylǵan «Dástúr Fest» kórmesiniń basty maqsaty – halyq arasynda din men dástúr sabaqtastyǵyn dáripteý bolyp tabylady.
