Ústel tenısinen Qazaqstan quramasynyń múshesi Kırıll Gerasımenko Parıj oıyndaryna qatysatyn boldy. Ol olımpıadalyq sıkl barysyndaǵy irikteý kezeńderinde jınaǵan upaı nátıjesi boıynsha Olımpıadaǵa joldama ıelenip otyr, dep habarlaıdy almaty-akshamy.kz.
Halyqaralyq ústel tenısi federasıasynyń jańarǵan reıtıńinde qazaqstandyq tenısshi qurlyqta joldama almaǵan sportshylar arasynda birinshi orynda tur.
Gerasımenko osymen úshinshi ret Olımpıada oıyndaryna joldama alyp otyr. Ol buǵan deıin Rıo-2016 jáne Tokıo-2020 oıyndaryna qatysqan bolatyn. Alaıda, júldeli oryndarǵa iline almady.
Aıta keteıik, qazirgi ýaqytta Qazaqstan sportshylary ıelengen joldamalar sany 69-ǵa jetti. Onyń ishinde eń kóp joldamany elimizdiń boksshylary ıelenip otyr.