Burynyraqta, balalyq shaqtary 80-90 jyldary ótken qazirgi aǵa-ápkelerimizdiń esinde bolar, analarymyz kıim alsa, ásirese, syrt kıimdi denege shap-shaq qylmaı, keńdeý etip, 1-2 ólshemge úlkendeý etip alatyn. Onysy sán emes, «keler jyly da kıe beredi» degen jeleýmen alynatyn. Sóıtip, bir paltony birneshe maýsym kıip júre beretin kúnder kelmeske ketti.
Dese de, sán álemi maýsym saıyn, tipti kún saıyn ózgerip jatady. Buryn qolbyratyp, salpıtyp kıip alýǵa namystansaq, qazir óz ólshemińnen úlken kıimdi kıý, kerisinshe, sánge aınaldy. Muny kıim kıý stılindegi oversaız dep ataıdy. Oversaız osydan birneshe jyl buryn kóptegen sánqoılardyń júregin jaýlap úlgerdi jáne óz pozısıasyn berer emes. Sán ózgerse de, bul stıl jyl ótken saıyn kópshilik jaqsy kórip kıetin, tanymal bola tústi. Eń bastysy, oversaız erkin qozǵalys pen óz bolmysyńdy kórsetýdiń bir joly retinde kórinis tapty. Sebebi bul stıldegi kıim ózińdi qolaıly ári stıldi sezinýge múmkindik beredi.
Kıim kıýdegi oversaız degen ne?
Bul ataý bizge aǵylshynnyń oversize degen sózinen, ıaǵnı, «óte úlken» degeninen kelgen. Sán salasynda bul termın keń pishimdi zattardy bildirý úshin qoldanylady. Bul stıldegi kıim kólemdi bolǵannan keıin óziniń emes, ózgeniń ıyǵynda turǵandaı kórinedi. Qarapaıym, ári kúndelikti ómirde yńǵaıly kıingisi keletinderge oversaız stıliniń unary sózsiz.
Oversaızdy qalaı kıý kerek?
«Boıaýshy, boıaýshy degen saqalyn boıapty» degenniń keri bolmas úshin, sán eken dep kelsin, kelmesin ústimizge japsyra salǵan bola qoımas. Ár salanyń óz mamandary men sheberleri bar degendeı. Sondyqtan kez kelgen kıimdi jarasymdy etip kıý úshin stılıserdiń de aıtaryna qulaq asý kerek. Osy stılde kıiný úshin nege mán berip, neni bilgen jón:
- Jıyntyqta (komplekt) bir ǵana kólemdi kıim bolǵany jón, sol kezde obraz áldeqaıda úılesimdirek kórinedi.
- Mınımalızm stıli asa salmaq salmaı, kózge oǵash kórinbeıtin oversaız obrazyn jasaýǵa jaqsy jarasady.
- Kólemdi kıim artyq salmaqty jasyrmaıdy, kerisinshe, ony odan da úlken etip kórsetedi.
- Oversaız úshin eń utymdy túster monohromdy nemese basqa da kózge bir qaraǵanda jaıly reńkter sátti bolady. Al eger kıimniń túsi óte ashyq nemese prıntti bolsa, bul kıim jıyntyǵynda basqa kıimderdiń beıtarap bolýyna mán berińiz.
Kıimdi retpen, sánmen, jarastyra kıe bilý de – óner. Búginde jastyń da, káriniń de kóńilinen shyqqan oversaız batystan kelgen stıl bolsa da, tyrystyryp kıinip júrgennen kóri keńinen, molynan bolǵannan keıin de qazir biraz adamnyń jappaı kıiný sánine aınalǵan bolar. Adam kórki – shúberek. Sondyqtan, zaman qansha damyp ketse de, etek-jeńimizdi jabatyn, boıǵa ádemi qonatyn kıimnen alystamaıyq.