TMD elderinen 16,9 myń tonna kıim ákelingen.
Qazan aıynyń qorytyndysy boıynsha elimizde kıimniń baǵasy jyl ishinde 14,6%-ǵa kóterilgen, dep habarlaıdy Almaty-akshamy.kz Energyprom.kz-ke silteme jasap.
Kıim eń qatty qymbattaǵan óńir Astana qalasy, mundaǵy jyldyq ósim 25% bolǵan. Baǵa Qyzylordada 19,8%, Aqmola oblysynda 19% ósken. Eń az ósti degen Aqtóbe oblysynyń ózinde 9,7%-ǵa kóterilgen. Sonyń ishinde er adamdardyń kıimi jyl ishinde 14%-ǵa, áıelderdiki 14,1%, balalar kıimi 17,2% qymbattady.
Bıylǵy qańtar-qyrkúıekte elimizde kıim óndirisi jyl burynǵy kórsetkishke qaraǵanda aqshalaı mánde 12,7%-ǵa artyp, 43,1 mlrd teńgeni qurady. Ónimniń basym bóligi Shymkentke tıesili, jyldyq ósim 44%, aqshalaı 7,4 mlrd teńge. Ekinshi orynda Almaty - 6,9 mlrd teńge, 15,2%-ǵa artqan. Almaty oblysynda kıim óndirisiniń kólemi kerisinshe 48,6%-ǵa qysqarypty, aqshalaı mánde 4,2 mlrd teńgeni qurady.
Jyldyń alǵashqy segiz aıynda toqyma jáne kezdemeden tigilgen kıimder ımporty 71 myń tonna bolyp, 888,9 mln dollardy qurady. TMD elderinen 16,9 myń tonna kıim ákelingen, jyl burynǵy mánnen 2,9%-ǵa az. Uıym aıasynda elimizge kıim jetkizetin negizgi el – Ózbekstan - 10,2 myń tonna, kórsetkish 5,4%-ǵa azaıypty.
TMD-ǵa kirmeıtin elderden 54,1 myń tonna kıim ákelingen, ótken jylmen salystyrǵanda 17,8%-ǵa ulǵaıǵan. Negizgi ımporterler Qytaı (39,3 myń) men Túrkıa (12 myń).