«Ashyq NQA» portalynda Oqý-aǵartý mınıstrliginiń baspa qatemen basylǵan oqýlyqtardy qaıta shyǵarýǵa mindetteıtin buıryǵynyń jobasy jarıalandy, dep habarlaıdy Almaty-akshamy.kz QazAqparatqa silteme jasap.
Atalǵan buıryqtyń jańa nusqasynda buryn bolmaǵan 24-1 tarmaq usynylyp otyr. Onyń mazmuny mynadaı:
Oqýlyqty basyp shyǵarý quqyǵyna ıe bolǵan baspa memlekettik satyp alý týraly kelisimshart boıynsha jergilikti atqarýshy organdar satyp alǵan oqýlyqtar men oqý-ádistemelik keshenniń tırajyn kelesi jaǵdaıda aýystyrady:
1) Pándik saraptama komısıasy bekitken nusqadan aýytqý saldarynan jiberilgen qateler jáne basqa da kemshilikter anyqtalǵanda;
2) arnaıy komısıa qoldanystaǵy oqýlyqtar men oqý-ádistemelik keshende jalpyǵa tanymal jáne ǵylymı faktilerdiń burmalanýyn, málimetterde (oqıǵa, kúni, aty, tegi, ákesiniń aty, ataýy, dáıeksóz, anyqtama, zańdylyq, ereje, aksıoma, ılústrasıa ataýynda) faktologıalyq qatelikterdiń jiberilýin rastaǵanda.
Buıryq jobasnyda mundaı arnaıy komısıa Bilim mazmunyn saraptaý ortalyǵynyń qoldanystaǵy oqýlyqta jáne oqý-ádistemelik keshende qate (qateler) tabylǵan jáne ony baspa moıyndamaǵan jaǵdaıda qurylatyny aıtylǵan.
«Komısıa quramyna ǵylymı, bilim berý jáne qoǵamdyq uıymdardyń ókilderi enedi. Olardyń sany taq jáne buryn saraptamaǵa qatyspaǵan bolýy qajet. Sheshim baspanyń dálelderine qatysty yqtımal qatelikterdi jan-jaqty jáne obektıvti qaraý negizinde qarapaıym kópshilik daýyspen qabyldanady. Komısıa músheleriniń jumysyna aqy tólenbeıdi», - dep jazylǵan qujatta.
Qujat 28 qarashaǵa deıin qoǵam talqylaýyna usynylyp otyr.