Kardıologıa jáne ishki aýrýlar ǴZI-da Rýmynıadan kelgen jetekshi ıntervensıalyq kardıolog jáne radıolog Marin Postu qatysýymen rotasıalyq koronarlyq aterektomıa (rotablasıa) boıynsha sheberlik synyp ótti.
Sheberlik synypqa Almaty qalasy men elimizdiń óńirleriniń rentgenhırýrgtary jınaldy, dep habarlaıdy Almaty-akshamy.kz
Rotasıalyq koronarlyq aterektomıa – bul joǵary jyldamdyqty gaýhar búrikkish aınalmaly burǵy arqyly koronarlyq arterıanyń stenozdy zaqymdanýyn joıýdyń zamanaýı ádisi. Rotablator aterosklerotıkalyq kalsılengen túıinshekteri bar arterıalardyń ótkizgishtigin qalpyna keltirýge arnalǵan.
Operasıa kezinde dárigerler júrektiń «qataıǵan» tamyrlaryn burǵylaıdy, olar qubyr tárizdi kalsılengen ákpen jabylǵan. Rotablasıasyz stentti tolyǵymen ashý, tamyrdyń tolyq ashylýyn jáne qan aǵymyn qalpyna keltirý múmkin emes.
Rotablasıa - qatty jáne kalsılengen aterosklerotıkalyq túıinshekterdi emdeýdiń tıimdi revolúsıalyq ádisi. Biraq prosedýra kúrdeli asqynýlarǵa toly bolǵandyqtan, ony saraptamalyq deńgeıdegi klınıkalarda joǵary bilikti tájirıbeli dáriger jasaý kerek.
«Sheberlik synyp aıasynda 2 kún ishinde júrektiń ıshemıalyq aýrýy, koronarlyq arterıanyń sozylmaly oklúzıasy, kalsılengen zaqymdanýy bar 50-73 jas aralyǵyndaǵy pasıentterge birneshe operasıa jasalady»,-deıdi Kardıologıa jáne ishki aýrýlar ǴZI Basqarma tóraǵasy Marat Pashımov.
«Medısına bir orynda turmaıdy. Biz, dárigerler, kún saıyn damyp, zaman kóshine ilesýimiz kerek. Sondyqtan óz qyzmetkerlerimizge osyndaı sharalardy únemi uıymdastyryp, jetekshi sheteldik medısınalyq ortalyqtarǵa jiberip, olarmen baılanys ornatyp, ózimizge shaqyryp turamyz», - deıdi ol.
«Bul arnaıy tehnıkalar men materıaldardy qoldanatyn óte kúrdeli operasıa. Barlyq operasıalar sátti aıaqtaldy. Men munda úıretýshimin dep aıta almaımyn, biz tájirıbe almasýdamyz. Osy salada men 10 jyl jumys isteımin. Jańashyldyq – biz eń zamanaýı materıaldardy paıdalandyq. Negizinde, mundaǵy dárigerler muny qalaı jasaý kerektigin biledi, biraq buǵan deıin olardy is júzinde qoldanbaǵan», - deıdi rýmynıalyq qonaq.
Rentgenendovaskýlárlyq operblok meńgerýshisi Alekseı Kolesnıkovtyń aıtýynsha, rotablasıa koronarlyq arterıanyń kalsılengen stenozymen naýqastardy endovaskýlárlyq emdeýdiń balama ádisi bola alady. Bul pasıent úshin barlyq qaýipter men qolaısyzdyqtarǵa toly kólemdi ashyq operasıadan saqtaıdy.
Teri arqyly koronarlyq ıntervensıalarda rotasıalyq aterektomıany qoldaný sonymen qatar asqynýlardyń damý qaýpin azaıtýǵa, koronarlyq arterıanyń kalsılengen stenozymen naýqastardyń ómirin saqtaýǵa jáne ómir súrý sapasyn jaqsartýǵa múmkindik beredi, pasıentterdiń emdeýge jatý uzaqtyǵyn qysqartady.
Pasıentter klınıkadan sımptomatıkalyq jaqsarýmen shyǵarylady.
Marin Postu-20 jyldan astam tájirıbesi bar ıntervensıalyq kardıolog jáne radıolog. Ol jylyna 1000-nan astam dıagnostıkalyq angıografıany jáne teri arqyly aralasýdy, negizinen koronarlyq aralasýlar (shamamen 80%) jáne tamyrly aralasýdyń barlyq túrlerin jasaıdy. Mıokard ınfarktisine alǵashqy teri arqyly koronarlyq aralasýdy júrgizýde úlken tájirıbesi bar. Polsha, Bosnıa jáne Gersegovına, Lúksembýrg jáne t.b. elderdegi ıntervensıalyq kardıologıa jáne radıologıa boıynsha barlyq mańyzdy kongrester men kýrstarǵa qatysady. Ol Rýmynıa kardıologıa qoǵamynyń ıntervensıalyq kardıologıa boıynsha jumys tobynyń Prezıdenti.