Úkimet janyndaǵy komısıalar sany 70-ten 25-ke qysqartyldy
QR Premer-Mınıstri Álıhan Smaıylov memlekettik apparat qyzmetin búrokratıadan aryltý máseleleri jóninde keńes ótkizdi. Keńes barysynda Memleket basshysynyń tıisti Jarlyǵyn oryndaý úshin 30-dan astam is-sharadan turatyn İs-qımyl jospary júzege asyrylyp jatqany aıtyldy, dep habarlaıdy Almaty-akshamy.kz Úkimettiń resmı saıtyna silteme jasap.
Qabyldanyp jatqan sharalar memlekettik organdardy nátıjeli jumysqa, azamattardy tolǵandyratyn máselelerdi tıimdi ári sapaly sheshýge baǵyttaýǵa múmkindik beredi.
Máselen, búgingi tańda Úkimet qaýlysymen komısıalar sany 70-ten 25-ke deıin qysqartyldy. Osyndaı jumystar mınıstrlikterde de júzege asady. Qujattardy qaraý merzimin eki ese qysqartatyn, sondaı-aq norma shyǵarý prosesin qaıta quratyn Úkimettiń jańa reglamenti ázilenip jatyr. Reglamenttiń jańa redaksıasy jaqyn arada bekitiledi.
Sonymen qatar, Úkimet basshylyǵynyń qoldanystaǵy tapsyrmalary tekserilip jatyr. Mańyzdylyǵyn joıǵan jáne qaıtalanatyn tapsyrmalardyń barlyǵy alynyp tastalady.
Sondaı-aq, «E-ótinish» aqparattyq júıesiniń bazasynda memlekettik organdar jumysynyń tıimdiligin arttyrý jáne búrokratıadan aryltý jónindegi usynystardy jınaıtyn onlaın-resýrs qurylady.
«İs-qımyl jospary óte qysqa merzimde oryndalýy tıis. Barlyq tarmaqtyń oryndalý sapasyna nazar aýdarýdy suraımyn», - dedi QR Premer-Mınıstri.
Álıhan Smaıylov atqarylyp jatqan sharalar memlekettik apparattyń jumysyn edáýir jeńildetip, qoǵam úshin barynsha tıimdi ári ashyq bolýy tıis ekenin atap ótti.